Knuste Solid på Kvednabekkjen

Trio viste musklar i treningskampen mot komande sesongs puljemotstandar Solid laurdag.

Både Trio og Solid er nyopprykka til årets 4. divisjon. Og begge har ei målsetning om å vera på trygg grunn på tabellen når sesongen er ferdigspelt i slutten av oktober. Men i laurdagens treningskamp var det berre eitt lag på bana. Og det var Aleksander Ekeland sitt Trio.

Det tok ikkje lang tid før Erik Voster Solberg skaut heimelaget i føringa. Og sjølv om heimelaget spelte i kvite bortedrakter for anledninga, var effekten av målet raud som ketsjup. Og det rann inn bak Solid-målvakta utover i omgangen.

Solberg dobla sjølv leiinga like etter, Eivind Saghaug la så på til 3-0 før Martin Veastad sat det fjerde like før pause. Trio-dominansen fortsette så med scoring frå innbytar Andreas Thorkildsen, før Martin Veastad igjen var frampå og laga det sjette.

Trio kunne med det jubla over å ha slått Solid med tennissiffer.

– Dei var ikkje så bra, og stilte ikkje med sitte beste mannskap. Så det er ikkje sånn at vi tek av etter denne sigeren. Men vi leverer ein solid kamp. Vi produserer mange sjansar og slepp til lite bakover, og det tek vi med oss, seier Aleksander Ekeland.