Landslagstrening og svart belte
Husnes Karateklubb kan sjå tilbake på vellukka helg, landslagstrening og ny svartbeltar.
7. - 10. juni deltok heile 37 medlemmer frå Husnes karateklubb på den årlege sommarsamlinga for Japan Karate Association Norway. Til saman 450 karateutøvarar samla seg på Stord for å la seg inspirera og trena med tilreisande toppinstruktørar frå Honbu Dojo Japan.
Artikkelen held fram under annonsen.
– Me vil gratulere alle medlemmer frå Husnes karateklubb som graderte seg til nye beltegrader. Ei spesiell helsing går til Andrè Stormoen som bestod gradering til 1. dan svart belte. To andre hardttrenande utøvarar i klubben er Brage Krey og Mathias Flesland Simonsen. Dei vart plukka ut av hovudinstruktøren til å delta som rekruttar på to grytidlege og harde morgontreningar med landslaget i karate. Me håpar me får høyre meir frå desse to i framtida, skriv styret i Husnes Karateklubb i ei melding.
Dei er strålande fornøgd med sine aktive medlemmer og melder at dei tek ein velfortent sommarferie.