Midt i blinken

Avtalen Ragnhild Femsteinevik har inngått med Dimmelsvik Bil, er truleg midt i blinken for skiskyttartalentet.

Onsdag ettermiddag tok Ragnhild Femsteinevik turen til Dimmelsvik for å henta ein splittar ny Toyota Auris hybrid.

– Eg er veldig nøgd. Det er viktig å ha god bil når ein skal reisa langt, sa 20-åringen under overrekkinga.

Samarbeidet kom i stand ved at Ragnhild kontakta bilfirmaet og spurde om moglegheitene for ein sponsoravtale. At det skulle enda med ein ny bil, hadde ho ikkje sett for seg.

– Men det er heilt greitt for meg, smilte ho.

 

Grisetøft

Dimmelsvik Bil har også tidlegare støtta lokal idrett. No har dei tatt sponsinga eitt steg lenger.

– Ragnhild går inn med ein sum sjølv, resten sponsar Dimmelsvik Bil. Avtalen gjeld for eitt år i fyrste omgang. Det er kjekt å støtta nokon som er så god som ho. Vi ynskjer å bidra til at ho skal få det til, og til at ho skal få køyra ein skikkeleg bil, kommenterte bilseljar Asbjørn Anfinsen.

– Sjå blinken på panseret. Og sjå skiskyttaren på sida, det er grisetøft, smilte han då han viste fram vedunderet.

Bilen er også utstyrt med skiboks på taket påskrive namnet på sjåføren. Og på sida står teksten «Rein bil – rein idrett».

– Dette er ein drivstoffbesparande bil, som òg gjev ei fantastisk køyreoppleving. Han går stille og roleg, og produserer sin eigen straum, reklamerte Anfinsen.

Før avtalen vart underteikna, hadde han eit kontrollspørsmål til skiskyttaren.

– Eg spurde kva mål ho har. Ho svarte «å bli best». Det er eit godt mål å ha.

 

Junior-VM

Talentet frå Hatlestrand jobbar to dagar i veka på Rosendalstunet, resten av tida er ho skiskyttar på fulltid. Det inneber ei treningsmengd som varierer frå 12 til litt over 20 timar i veka.

– Denne sesongen er målet å koma til junior-VM. Dei to fyrste konkurransane i Norges Cupen er uttakingsrenn til VM, så det gjeld å koma i form til dess. Elles er målet å gjera det best mogleg i Norges Cupen, opplyste Ragnhild Femsteinevik.

Som sportsinteresserte veit, er ho syster til Martin, som også driv med skiskyting.

– Trur du han blir misunneleg når han ser denne bilen?

– Eg satsar på det.