No kan løpsduellen mot Ronaldo bli ein realitet

Rolf Vidar Grønstøl Hansen er ein av tre kandidatar som får koma til Oslo og ta del i Drillo sin landslagstropp som møter Brasil til den store omkampen 9. juni.

– Dette er kjekt, det. Og det er noko eg aldri hadde aldri trudd skulle skje då eg meldte meg på med den videoen, seier Rolf Vidar.

Han fekk i dag (torsdag) ein telefon frå arrangørane av den store omkampen mellom Norge og Brasil om at han var ein av tre kandidatar som får koma til Ullevaal 9. juni. Her skal Drillo igjen velja ut ein av dei tre som skal få erstatta Ole Gunnar Solskjær, og med det representera Norge i kampen mot Ronaldo og Brasil.

– Det er nære no. Så får vi sjå kva Drillo går for, eg veit ikkje kva han skal vurdera når han skal velja, men vi får håpa det ikkje går for mykje i kor godt trent du er, ler Rolf og legg til:

– Uansett så er eg veldig nøgd. Det verkar som eg uansett får sitta på benken, så om det ikkje vert speletid på meg så er det jo uansett ei stor oppleving, seier han.

 

Skal slå Ronaldo

Han kastar seg i bilen saman kone og to born og køyrer mot Oslo full i nervar, det er tross alt barndomsheltane han kanskje skal opp mot.

– Ronaldo for meg er jo som Cristiano Ronaldo for dei som veks opp i dag. Men det er ikkje berre han, det er Roberto Carlos og Dunga, folk eg hadde plakat av på guterommet i ungdomsskuletida. Så eg får nok litt stjerner i augne, seier den tidlegare midtbanespelaren til Trio.

Så må vi venta til kampdagen for å sjå om han er den heldige som faktisk får speletid, vert det Rolf lover han å gje Ronaldo kamp i løpsduellen.

– Eg er ikkje rask, men akkurat den duellen skal eg gå sigrande ut av, ler han.