Ny medalje til Hjortland

Hatlestrand-jenta kjempa seg til bronse under Nevza-turneringa i Oslo i helga, og fekk med det ei fantastisk sesongavslutning.

– For ei sesongavslutning dette har vore. Eg hadde aldri trudd at eg skulle stå igjen med ein sølv og ein bronse på dei to siste store turneringane. Det er heilt fantastisk, seier Hjortland til Grenda.

 

Fersk duo

Som under NM danna Hjortland eit heilt fersk lag med si nye lagveninne Ingrid Lunde. Med to blokkspelarar på same lag nytta jentene opningskampane til å finna ut korleis dei skulle løysa oppgåvene.

– Etter planen var vi einige om at eg skulle spele forsvar, men fann tidleg ut at det fungerte betre om vi gjorde stikk motsett, seier Hjortland.

Laget opna med siger mot finsk motstand, men gjekk på ein smell då dei møtte norske kjenningar i andre kamp. Og med dobbel eliminasjonsmetode betydde det at laget ikkje tålte eitt tap til før sluttspelet. Med mykje omstilling og hardt arbeid knakk jentene formelen, og spelte til tider strålande volleyball til tross for det ferske samarbeidet. Dei feide det beste danske laget av banen i kvartfinalen, og skulle opp mot laget dei tapte for i turneringas andre kamp i semifinalen. Men sjølv med ny taktikk og betre volleyball, måtte jentene sjå seg slått 2-1.

 

Magisk følelse

Dermed vart det bronsefinale for laget som var rangert som nummer sju før turneringa. På andre sida av nettet sto eit svensk lag, rangert som nummer tre. Men førehandsfavorittane frå Sverige var aldri i nærleiken av å gi Hjortland og Lunde kamp. Med 21-13 og 21-9 i setta vart det ein overlegen siger i kampen om bronsen. Noko Hjortland kan fortelje var ein magisk følelse.

– Det var utruleg godt å få denne medaljen. Vi spelte heilt fantastisk saman, og overraska mange med dette resultatet. Det er ein perfekt avslutning på sesongen. Samtidig aukar det sjansen for at eg får spelt internasjonale turneringar neste sesong, seier Hjortland som og ønskjer å takka alle dei lokale støttespelarane i Kvinnherad.