Nye bortetap for Trio og Rosendal

Vi må framleis venta på sesongens første herresiger i Kvinnherad-fotballen. Laurdag tapte både Trio og Rosendal 3-0 på bortebane.

Med heile ti forfall var det eit redusert og ungt Rosendal-lag som reiste til Bergen for å måla krefter mot Ask laurdag ettermiddag.

Straffebom

Kvittrøyene hadde alle tiders moglegheit til å ta leiinga då dommaren peikte på straffemerket etter ein halvtime, men hadde ikkje marginane med seg.

– Straffen går stang ut, noko som kanskje er litt typisk for eit lag i motgang. Men vi leverer årsbeste i første omgang. Vi kjem til fleire gode moglegheitar, men får ikkje pirka ballen inn. I staden er det Ask som tek leiinga like før pause, seier Kjetil Helvik.

Like etter sidebytte dobla Ask leiinga, noko som tvinga Rosendal høgare i banen.

– Vi kjem i overtal ved eit par anledningar utover i omgangen, men det vil seg liksom ikkje. Då utnyttar dei at vi står høgt og punkterer kampen ti minuttar før slutt, seier Helvik.

Dårleg start avgjorde

Trio var òg prega av ein god del forfall til dagens bortekamp mot Telavåg. Trenarduoen inkludert var det 13 mann på spelarbussen som køyrde i retning Sotra laurdag morgon, utan at Ekeland skuldar tapet på det.

– I dag kan vi ikkje skulda på at vi er få. Vi er ikkje på det første kvarteret, noko vi vert hardt straffa for. Vi får to mål i mot før det er spelt 15 minutt og så aukar dei til 3-0 ei stund før pause, seier Aleksander Ekeland.