Roger Ekeland er klar for ny klubb
Roger Blokhus Ekeland er lånt ut til 2. divisjonslaget Egersunds fram til sommaren.
– Det var ein spanande moglegheit som dukka opp. Og eg og Bengt var einige om at det var for alle partar. Det handlar jo i all hovudsak om at eg har lyst til å spela fotball kvar veka. Så får vi håpa at eg kan gjera sakene mine godt fram til sommaren, eg ser i alle fall positivt på det og gler meg til sesongstart, seier Roger til Grenda.
Artikkelen held fram under annonsen.
Han signerte papira med Egersunds (EIK) torsdag i førre veke, og har allereie begynt å trena med sine nye lagkameratar.
– Det er jo alltid spanande med eit nytt miljø, men eg kjenner nokon av dei frå før og har blitt tatt godt i mot av resten, så det har gått veldig bra, seier målgarantisten som scora 10 mål på 10 kampar for Sandnes Ulf 2 førre sesong.
Pendlar
Han blir buande i Sandnes og skal pendla med tog til treningane i Egersund.
– Toget tek 50 minutt, men det har gått veldig bra så langt. Så har vi fri på onsdagane, så då blir eg igjen i Sandnes og trener med dei, seier Roger.
For etter at låneopphaldet på tre og ein halv månad gått ut, så er målet å venda tilbake til dei lyseblå og kjempa om ein plass i laget der. Men fyrst håpar han å bidra til at EIK får ein god sesong i 2. divisjon.
– Det blir lokaloppgjer mot Bryne og Vidar, samt kampar mot Vard og Hødd. Så eg er veldig klar til sesongstart i midten av april, seier Roger.
Artikkelen held fram under annonsen.
Sportssjef i EIK Fotball, Ojan Bijan, er strålande fornøgd med å ha sikra seg signaturen til angrepsspelaren frå Sandvoll.
– Roger Ekeland er ein naturleg målscorar med bra tempo i kroppen og eit potensiale vi trur vil visa igjen her hos oss. Hans spelestil passar godt inn hos oss, seier Bijan til klubben si heimeside.
EIK serieopnar borte mot Vålerenga 2 søndag 15. april.