Romjulscup for 26. gong
Tradisjon tru inviterer Rolf Vidar Hansen og IL Trio til fotballcup i Husneshallen i romjula.
– Romjulscupen vert på folkemunne i Europa rekna som den mest prestisjetunge og viktigaste turneringa etter Champions League. Det er ein folkefest som får julefeittet til å skjelva og som engasjerer heile kommunen frå Borgundøy til Ølve, skriv arrangøren i ei pressemelding.
Artikkelen held fram under annonsen.
Dei oppmodar venelag, studiekameratar, fiendar, bedrifter, syklubbar og andre tenkjelege og utenkjelege konstellasjonar om å samla seg til kamp om lêrkula 2. og 3. juledag.
– Det er også i år eit sterkt ynskje om å få til ein dameklasse. Til det treng vi minst fire lag. Så meld dykk på damer og jenter i alle aldrar, står det å lesa i pressemeldinga.
Så står det att å sjå kven som skal utfordra dei regjerande meistrane Sunde Allstars og United i kampen om den gjeve pokalen i 2018.