Rune Åsheim Mo klar Os

Rune Åsheim Mo blir spelande assistenttrenar i 3. divisjonsklubben Os.

– Eg er veldig klar og gler meg stort. Etter gode samtalar med Endre (trenar), som var veldig entusiastisk rundt arbeidet med spelarutvikling og A-laget, blei eg veldig motivert, seier Mo til klubben si nettside.

Mo var ein viktig faktor til at Stord berga plassen i 3. divisjon førre sesong. Os på si side var suverene i sin 4. divisjon førre sesong. No skal Rune bidra til at gultrøyene vert eit slagkraftig lag i 3. divisjon i 2019.

– Eg trur at eg kan utvikla meg både som trenar og spelar i eit miljø med slike folk. Eg har også lyst til å vera med å bygga opp noko, og då trur eg Os Fotball er ein god plass, seier Mo til nettsida.

I tillegg til å vera spelande assistenttrenar får Rune ansvaret for ungdomsakademiet i klubben. Han vil også vera med å styrka FFO-tilbodet, samt bidra med administrative oppgåver.

– Rune er ein utruleg flink og hyggeleg type, i tillegg til å vera ein god fotballspelar. Han er ein klubbmann, og kan minna litt om Endre. Slike personar veks ikkje på tre, og at han ynskjer å bruka tida si på Os Fotball er eit godt teikn for klubben. Han er ein mann for framtida som kan vera her i mange år, seier sportsleg leiar Jan Frode Skeie til Osturn.no.