Serieopnar borte mot Trott
Fyrste helga etter påske rullar endeleg lokalfotballen igjen. Og Trio skal få bryna seg på toppnivået i 4. divisjon alt i fyrste serierunde.
Trio-trenar Aleksander Ekeland sitt nyopprykka mannskap er nemleg sett opp med bortekamp mot Trott 7. april. Eit lag som fram til siste serierunde i fjor kjempa om opprykk til 3. divisjon.
– Det tenkjer eg gjev oss sjansen til å sjå kor vi ligg an frå start av, seier Ekeland.
Artikkelen held fram under annonsen.
Laurdag 14. april tek Trio i mot Bergen Nord til årets fyrste heimekamp. Eit lag som slo Trio 2-1 i fjorårets krinsfinale.
Vidare er det verd å nemna at Trio avsluttar både vår og haust-sesongen med lokaloppgjer mot Odda. Fyrst heime på Husnes stadion 23. juni, før dei reiser til Odda 20. oktober.
– Målet vårt for sesongen er enkelt og greitt å unngå nedrykk samtidig som vi ynskjer å utvikla oss både individuelt og som lag undervegs i sesongen. Og vi har eit stykke arbeid å gjera før sesongen sparkar i gang. Blant anna er eit av delmåla våre å vera vanskeleg å spela i mot, då må vi vera i enno betre fysisk form enn vi var i fjor, sluttar Ekeland.
Tøff start for Erling
Den heimvendte son, Erling Hansen, debuterer som spelande trenar mot førehandsfavorittane Bremnes på Olvondo stadion. Laget han i helga tapte 8-1 mot. Vidare tek Inter Bergen turen til Halsnøy 14. april.
Likeins med Trio så avsluttar Halsnøy både vår- og haustsesongen med lokaloppgjer. Dei tek nemleg i mot Fitjar til siste kamp før sommarferien, og avsluttar sesongen i Fitjar idrettspark 20. oktober.
Artikkelen held fram under annonsen.
Debuterer på Kuventræ
Årets fyrste seriekamp for den ferske damelagstrenaren Tor Gundersen og hans Rosendal/Trio blir borte mot Os/Nore Neset på Kuventræ kunstgras 15. april. Eit lag dei banka heile 8-1 heime i Rosendal førre sesong, men som dei berre klarte 1-1 mot i Os.
Vidare får Askøy æra av å vera det fyrste laget som spelar seriekamp mot damelaget på Rosendal stadion 22. april. Sesongen vert avslutta borte mot Bjarg 21. oktober.
Terminlista til 6. divisjon herrar er enno ikkje offentleggjort. Noko som betyr at Trond Inge Haugland og hans Rosendal må smøra seg med litt tolmod før dei veit kva tid dei skal opp mot tidlegare Rosendal-spelar Anders Nilsen og hans Norheimsund.