Sjå bilete frå 3D-NM

Då bladfyken var i Tveitedalen og freista på nokre blinkskot, glimta deltakarane frå Kvinnherad Bogeskyttarklubb med sitt fråvere. Desse dukka heldigvis opp i Ole Berntsen si siktelinje, fotografen den lokale klubben hadde hyra inn for høvet, og biletserien er dermed ikkje fullstendig tom for lokale andlet.

Forutan dei bortgøymde kvinnheringane var det ei røys med andre kjekke folk i løypene - dette på trass av at det for dei fleste ville vore enklare og kjappare å reisa til Spania. Dette hevda iallfall Tom Halvorsen. Eller kanskje var det Lars Marius Sørlie? Eg visste det ville bli krøll med namna; våt kulepenn og papir som var tørt då eg reiste heimeifrå. Samt ein deltakargjeng som villig prata samstundes.

Dei to som kom køyrande med langbogane sine frå Nord-Møre hadde brukt tolv timar på vegen for å koma hit. Likevel var dei fulle av energi der dei fortalte om kor estetisk flott det var å sjå regnet som hengte at i lufta når pila var sleppt. Hans Torslett demonstrerte villig.

Så kva baud Kvinnherad på?

Fantastiske løyper, ei real bløyte, mykje god steming, fleire øydelagte og forsvunne piler, rykande varm burger og ein krevjande men kameratsleg konkurranse. Q-tipsane vart dessutan delt mellom deltakarane med kjappe rørsler i bukselommehøgde, då sikter fulle av regn tetta for nettopp sikt. Verdifulle verktøy, så lenge det vara...