Skipar Kvinnherad Sykkelklubb

For å samla alle syklande kvinnheringar under same vengja, går Roger Nundal og Oddvar Eikenes no i front for å starta Kvinnherad Sykkelklubb.

– Det er så utruleg mange som syklar her i kommunen vår. Vi ønskjer å få opp eit samhald og samla alle sykkelentusiastar i Kvinnherad Sykkelklubb, seier Roger Nundal.

Arbeidet med stiftinga av klubben er allereie godt i gang. Men det er ein stor prosess for å få gjort alt etter forskriftene, og gjengen ønskjer difor å få samla alle sykkelentusiastar til eit stiftingsmøte. Så om du er interessert i å ta del i oppstartinga av den klubben, er stiftingsmøtet på Husnes ungdomsskule tysdag 28. juni plassen å vera.

– Her er alle velkomne. Kvar og ein som er interessert i sykkel har noko her å gjera. Til fleire vi er, jo betre er det, seier Eikenes.

I dag er dei 84 medlemmer på Facebook, og er stadig ute på sykkelturar saman. Men med ein klubb på plass får sykkelentusiastane fleire fordeler.

– Er ein medlem i ein klubb får ein løyst heilårslisens. I dag må vi kjøpa lisens for kvart løp, noko som er både dyrt og tungvint. Inne i ein heilårslisens ligg det òg forsikring under trening. Og sjølv om vi har tenkt å halda oss på sykkelen, er det viktig å ha når ein ferdas langs landevegane, seier Eikenes.

– I tillegg får vi opp eit samhald og ein følelse av at ein er del av eit større lag. Vi vil få eigne drakter, organiserte treningar og kan reisa saman på konkurransar, seier Nundal.