Strand-Ulv-jentene klare for bronsefinale
Strand-Ulv sine volleyballjenter tapte semifinalen mot KFUM Stavanger laurdag, og er med det klare for bronsefinalen i NM.
Strand-Ulv sine U17-jenter har på imonerande vis smasha, serva og blokka seg gjennom både gruppespel og sluttspel i Førdehuset denne helga. Og tok seg til ein semifinale utan å ha tapt eit einaste sett.
Artikkelen held fram under annonsen.
I gruppespelet vart det 2-0 mot Bodø Volley, Vindafjord og Tønsberg Volley, før Kolbotn vart slått med same siffer i laurdagens kvartfinale.
Men mot Bjørn Maaseide sitt KFUM Stavanger fekk dei svartkledde jentene frå Varaldsøy, Ølve og Hatlestrand det tøffare. Jentene frå Rogaland tok tak i kampen frå fyrste sett, og kunne til slutt jubla over ein finaleplass etter å ha slått Strand-Ulv 2-0 i sett.
Med det ventar kampen om bronsen klokka 09.45 søndag morgon. Her møter dei taparen av Sandnes Volleyballklubb og KVK.
Gutane til Strand-Ulv fekk det litt tøffare enn jentene i gruppespelet. Dei opna fredag med tap mot både KSK og KFUM Volda, men slo tilbake mot Torvestad i sin siste kamp i gruppespelet.
I 1/8-finalen laurdag vart det tap mot Tønsberg. Med det kjempar dei no i plasseringssluttspelet om å bli nummer 9.