Surt tap mot Danmark

Tina Abdulla og det norske juniorlandslaget i handball tapte tysdag kveld 30-28 mot regjerande europameister og førehandsfavoritt Danmark.

Den lynraske kantspelaren frå Husnes vart frå innbytarbenken vitne til ein målrik første omgang der to jamgode lag heile vegen kniva om å vera i førarsetet, men der begge til slutt måtte nøya seg med å gå til pause på stillinga 15-15.

Etter sidebyte tok Tina plass på høgrekanten. Trass mange oppofrande løp kom 18-åringen aldri til dei heilt store målsjansane. Etter ni minutt på banen var ho i overkant røff i forsvar og fekk betalt i form av ei to-minuttars utvisning.

Etter utvisinga vart Tina verande på benken og måtte sjå at det var dei kvitkledde danske jentene som sakte, men sikkert segla ifrå utover omgangen.

Sjølv om Norge la inn ein god sluttspurt, var det Danmark som kunne jubla høgast etter å ha slått Norge 30-28.

Allereie onsdag kveld møter Tina og Norge Angola til dyst i gruppe A.