Tapte mot Krabbetor

Det vart ein dag med stang ut for Rosendal/Trio då dei tapte 3-1 borte mot eit aggressivt Krabbetor søndag.

– Det er for så vidt fortent, det er det. Det vart ein fysisk knallhard kamp der Krabbetor er meir på enn det vi er, seier Tor Gundersen.

Heimelaget tok føringa ein halvtime ut i fyrste omgang. Ei leiing vertane tok med seg til pause, men det kunne fort sett annleis ut. Silje Soldal var nemleg berre eit par hårstrå unna å nikka inn utlikninga på overtid av fyrste omgang. Men metallet stod i vegen.

– Det var ein dag der ting ikkje skulle klaffa. Det var litt stang ut og marginar i mot, samtidig som vi ikkje er så på som vi skal vera. Vi får ein god prat i pausen, og går offensivt ut. Men så skjer det som så ofte skjer når du står høgt, du får ein i mot, seier Tor Gundersen.

Tre minutt etter at Krabbetor hadde dobla leiinga var Ingeborg Ljostveit framme og skaut Rosendal/Trio tilbake i kampen.

– Etter det så føler eg at Krabbetor sakte, men sikkert kjempar kampen inn igjen i deira spor, og når dei sette 3-1 like før 80, så resignerte vi litt, seier Gundersen.

Neste kamp for kvittrøyene er borte mot NHH fyrstekomande søndag.