Tina Abdulla er klar for Borussia Dortmund

Høgrekanten frå Husnes har skrive under for den tyske serieleiaren i handball.

– Eg føler ikkje at det er heilt sant endå. Men jo fleire gongar eg seier det høgt til meg sjølv, jo meir realistisk blir det. Det er veldig, veldig stort og eg merkar at det kriblar i heile kroppen no, sprudlar 22-åringen frå Husnes.

Etter fire sesongar for Tertnes, bytar Tina ut den blå drakta med Dortmund sine velkjente gule drakter neste sesong. Bak på ryggen vil den hurtige kantspelaren bera draktnummer elleve.

– Både eg og Allkan (bror hennar) har liksom alltid hatt nummer elleve sidan vi var små. Mamma har bursdag den 11. og det er det nummeret eg har brukt heilt til eg kom til Tertnes. Så då eg fekk sjansen til å ta tilbake det, så måtte eg byta, smiler Tina.

 

Ein draum

Etter planen skal ho byrja i Dortmund 6. juli. Som igjen betyr at ho har spelt sin siste kamp for Tertnes.

– Eg føler framleis at eg skal på trening med Tertnes neste sesong, så det er litt rart. Ikkje minst så er det vemodig å skulla pakka sakene sine og reisa frå venninnene sine til ein heilt ny by, men eg gler meg stort, seier Tina.

Det var fleire klubbar som har vist si interesse for den målfarlege høgrekanten den siste tida, men då Dortmund kom på banen, var 22-åringen aldri i tvil.

– Det blei eit enkelt val. Dei har gjort det såpass bra denne sesongen, og så blir det Champions League-spel neste sesong. Det er eit av mine absolutt største mål, det trur eg blir dritfeitt, slår ho fast.

5. mars var Tina på besøk i Dortmund for å sjå laget spela kamp. Med seg heim fekk ho eit kontraktsforslag.

– Den kontrakten signerte eg då vi hadde kome heim. Eg skjønner det ikkje heilt, men det er veldig, veldig stort. Ein draum som går i oppfylling, sluttar den ferske Dortmund-spelaren.