Tok sin tredje strake ligasiger
Tina Abdulla og Borussia Dortmund knuste Buxtehuder SV 36-19 onsdag kveld.
På grunn av Champions League-spel har Borussia Dortmund hatt ein liten pause frå spel i den heimlege ligaen. Onsdag var dei igjen i aksjon i Bundesligaen, då dei tok i mot Buxtehuder SV til sin tredje ligakamp for sesongen.
Artikkelen held fram under annonsen.
Ein kamp som berre kan beskrivast som ein festkveld for Tina Abdulla og lagvenninnene hennar.
Vertane varta opp med strålande angrepshandball, og gav aldri gjestane ein sjanse til å hengja med i kampen. Tina scora tre mål frå sin høgrekantposisjon og eitt frå sjumetersmerket, og bidrog med det til at Dortmund til slutt vann 36-19 mot Buxtehuder.
Med det ligg Dortmund, som har ein kamp mindre spelt enn ligaleiar Bietigheim, på andre plass med full pott etter tre kampar.
Laurdag skal gultrøyene igjen i aksjon i Europas gjævaste handballturnering. Då mot kroatiske Podravka Vegeta.