Tok sølv etter surt finaletap mot Sverige

Lars Kristian Ekeland og Jens Aasgard frå Strand-Ulv spelte begge då Norge sitt U17-landslag tok sølvmedalje i den nordeuropeiske meisterskapen torsdag.

Denne veka har Nord-Europa sine beste volleyballspelarar under 17 år vore samla i danske Ikast for å kjempa for sitt land si æra i Nevza-turneringa.

Og på det norske landslaget var det to kvinnheringar i sving, nemleg Strand-Ulv-spelarane Jens Aasgard og Lars Kristian Ekeland.

 

God start

Etter å ha levert varene mot alle sine motstandarar utanom Sverige i gruppespelet, sikra Strand-Ulv-duoen og dei andre norske landslagsspelarane finaleplass då dei banka Færøyane 3-0 i semifinalen onsdag ettermiddag. Med det venta deira einaste overmenn så langt i meisterskapen, nemleg svenske söta bror, i finalen torsdag.

Her fekk Lars Kristian, Jens og resten av dei, for dagen svartkledde norske landslagsspelarane, raskt kontroll og gjekk opp i 1-0 etter fyrste sett.

I sett nummer to var det naboane i aust som var best, dei utlikna til 1-1 i sett etter å ha slått Norge 25-20.

 

Svensk jubel

I det viktige tredje settet følgde kamphanane kvarandre til døra frå start til slutt. Men då settet skulle avgjerast sette den norske landslagstrenaren inn både Lars Kristian og Jens. Det viste seg å bera frukter då Norge drog settet i land på stillinga 25-23.

Det fjerde settet vart også eit av det jamne slaget, men svenskane var det beste laget totalt sett og utlikna til 2-2 etter å vunne settet 25-22. Med det skulle finalen avgjerast med tie-break.

Her var svenskane suverene og tok tidleg føringa i kampen. Dei heldt stand settet ut og vann til slutt 15-8. Med det var det Sverige som kunne jubla for gull i Nevza-turneringa, medan Lars Kristian og Jens fekk ein sølvmedalje med seg heim i retur Strand-Ulv-hallen.