Ut på tur med IL Ternen

Søndag 14. oktober er det klart igjen klart for Idrettslaget Ternen sin store turdag, Varden Opp.

– Varden Opp er ein familiedag der vi ynskjer å få folk ut i aktivitet. Opplegget blir mykje likt dei føregåande åra, det blir vaflar, kaffi og aktivitetar for heile familien på Skarvelandsstølen. I tillegg til motbakkeløp for store og små, seier Johannes Heien i IL Ternen.

Dei yngste som deltek i «Mini-Varden» har start på Skarvelandsstølen, medan dei som deltek i konkurranseklassen tradisjon tru startar på Skarveland skule, og skal derifrå kjempa om å bli fyrste mann eller kvinne opp dei 516 høgdemeterane til Varden.

– Og i år ser det ut som det skal bli eit kjempesterkt felt. Noko som forhåpentlegvis kan føra til at vi kan pressa kvarandre opp mot ny løyperekord. For både Marit Aarthun og Gunnar Årvik sine rekordar har stått lenge no, så det er på tide at vi får gjort noko med det, ler Heien.

Men rekord eller ei, det viktigaste er å få flest mogleg med ut på tur.

– Det er det viktigaste. Og det kjem til å bli ein kjekk dag uansett vêr, så her er det berre til å bli med alle mann, sluttar Heien.