Vidar Mehl til topps i Sverige

Terrengsyklisten frå Omvikdalen spurta seg førre laurdag inn til siger i det svenske terrengsykkelrittet Uddevalla MTB.

For å rista av seg konkurrentane, køyrde Vidar Mehl og lagkameratane frå Swix Hard Rocx landevegstaktikk frå start av. Og med høgt tempo i front rista dei av seg ein etter ein. Men etter 30 kilometer stakk Mehl frå teten og la ut på eigenhand.

– Eg sat i front og kokte meg sjølv ei stund, men då måtte også dei andre jobba hardt. Så kom Ole Hem seg opp til meg etter vel 45 kilometer, og derifrå køyrde vi saman til mål, seier Mehl til terrengsykkel.no.

Men i spurten var Mehl sterkast av dei to lagkameratane. Han kryssa mållinja på tida 2:14:36, eitt sekund føre Hem.

– Det var eit typisk svensk ritt med høg fart og aldri kvile. Det var ein skikkeleg rask og morosam løype med mykje svingar, flytstiar og kryss heile vegen, så ein måtte jobba hardt gjennom heile løypa, seier Vidar Mehl til terrengsykkel.no etter rittet.