Viktig siger til Trio

Ein strålande andre omgang var nok til at Trio vann 2-1 over Nordre Fjell laurdag, og kunne med det feira tre uhyre viktige poeng.

Kampen starta på verst mogleg vis då Nordre Fjell, etter berre seks minutt, spelte seg elegant fri langs høgrekanten. Og grunna slett forsvarsspel fann innlegget ein umarkert Nordre Fjell-angripar inne i boksen, som enkelt skaut bortelaget i leiinga. Men heimelaget viste vilje og kjempa seg tilbake i kampen. I det 17 minutt var Andreas Røyrvik høgast inne i feltet, og fekk stussa corneren frå Endre Eide til høgre for keeper. Trio var heldige som gjekk til pause på stillinga 1-1, etter ein svak fyrste omgang.

Etter pause var det eit heilt anna Trio-lag som entra banen, med mykje vilje og høg innsats tok heimelaget over styringa i kampen. Det var difor fult fortent då kaptein Ronny Hamre, i det 61. minutt, skaut heimelaget i leiinga, etter eit flott innlegg av Håvard Haga.

– Vi var heldige som ikkje låg under til pause, men i andre omgang springer vi sokkane av oss og tar ein fortent og viktig siger. Utruleg godt å få tre poeng igjen, noko vi ikkje har klart for mange gongar gjennom hausten, seier matchvinner Ronny Hamre.

Fyldigare kampreferat og kampfakta kan du sjå i tysdagens Grenda.