Munnleg eksamen går som vanleg til våren
For avgangselevar på studieførebuande og påbygg vil like mange som vanleg koma opp til munnleg eksamen denne våren.
Regjeringa har no bestemt at munnleg eksamen vil gå som normalt for elevar i 10. trinn, og for avgangselevar på studieførebuande og påbygg i den vidaregåande skulen. Munnleg-praktisk og praktisk eksamen vil derimot ikkje bli gjennomført.
– Regjeringa har vedteke å lytta til utdanningssektoren som meiner det vil vera for krevjande å gjennomføra munnleg og munnleg-praktisk eksamen for alle på studieførebuande VG3 og påbygg. Vi har stor forståing for at elevar og lærarar står i ei vanskeleg tid. Difor er det ikkje rett å gjera endringar i eksamenstrekket no, seier kunnskaps- og integreringsminister Guri Melby i ei pressemelding.
Artikkelen held fram under annonsen.
I februar vedtok regjeringa å avlysa vårens skriftlege eleveksamenar og munnleg-praktiske og praktiske eksamenar. Grunnen til det var smittevern og fordi det har vore ulike forhold for opplæring ved skulane rundt om i landet.
Dette er bestemt rundt eksamen våren 2021:
* Alle skriftlege eksamenar blir avlyst for elevar.
* Alle munnleg-praktiske og praktiske eksamenar blir avlyst for elevar.
* Lokalgitt munnleg eksamen for 10. trinn blir gjennomført.
* Lokalgitt munnleg eksamen for VG3 blir gjennomført.
* Privatistar og elevar med behov for eksamen for å få vitnemål og fag- og sveinebrev skal ha eksamen. Elevar med rett til ny, utsett og særskild eksamen våren 2021 gjennomfører eksamen saman med privatistane.
* Fag- og sveineprøvar vert ikkje avlyst, men skal gjennomførast etter gjeldande smitteverntiltak.