Kjell Rune Asmervik og ei anna av dei fastbuande på Fatland, Ella Nordbø, framfor multiballbingen som er under oppføring. - Det blir lettare å spela fotball når ballbingen vert ferdig. Og så blir det kjekt å stå på skøyter her om vinteren, seier Ella.

Dette er drivkrafta: At det er til nytte og glede for andre

Orda tilhøyrer Kjell Rune Asmervik, som må kunna seiast å vera primus motor i Fatland Vel. Den frivillige foreininga, som vart starta i 2014, jobbar for føremål som kjem ålmenta på Fatland på Halsnøy til gode.

Fatland Vel har dei siste åra stått for ei grundig opprusting av turløypene i området frå Arnavik til Sydnes, til glede for alle som likar å gå på tur, om dei er frå Fatland eller andre stader.

Arbeidet med turstiane har resultert i fem rundløyper, som skal knytast saman til ei stor rundløype på 19 km. Den nye skogløypa skal etter planen vera ferdig i løpet av 2023.

Artikkelen held fram under annonsen.

– Det er kjekt at andre har glede av turløypene, og veldig gøy å sjå tilstrøyminga av folk når ein lagar til nye rundløyper, seier Kjell Rune, då me treff han på Fatland.

– Sjølv synest eg det er mykje meir motiverande med rundløyper enn å gå fram og tilbake, legg han til som ei forklåring på arbeidet med rundløypene.

Arbeidet med stiane har innebore rydding, skilting, grusing og kloppelegging av våte parti. Den fyrste stien som vart rusta opp var Hjartestien, som høveleg nok har fått ein kloppelagt platting forma som eit hjarte.

Hjartestien på Fatland innbyr til tur. (Foto: privat)

Samlingsplassen

Me treff Kjell Rune på samlingsplassen eller leikeplassen, som er eit fellesområde like ved hovudvegen på Fatland. På den fint opparbeidde plassen er det sett ut fleire benkar, her er bålpanne, reilestativ og sandkasse for ungane.

– Me fekk midlar til å lage denne samlingsplassen, eller slagmarka som me av og til kallar han: Her slår me eit slag for både det eine og det andre, seier Kjell Rune skjemtsamt, og peikar via metaforen også på at det er lagt til rette for ein minigolfbane på den flotte plenen.

Arbeidet med samlingsplassen har vore gjort på dugnad av folk som bur i området. Kjell Rune peikar på ein fin mur laga av naturstein, med plankar oppå så han kan brukast som benk.

– Denne er det pensjonistar frå Fatlandsområdet som har stått for, seier han.

Det gjenstår litt arbeid med å setja opp ein gapahuk med langbord på området, slik at ein kan samlast uavhengig av ver og vind. Tømmeret til dette arbeidet ligg allereie klart på plassen.

Artikkelen held fram under annonsen.

I dette høvet vil Kjell Rune gjerne nemna Arne og Anna Gjerde, grunneigarar som har vore til hjelp med både materialar og areal, og som elles har lagt ned ein kjempeinnsats med å leggja til rette for allmenn bruk av området dei eig.

Kjell Rune viser fram den flotte samlingsplassen som Fatland Vel har laga til, med blant anna benkar og reilestativ. Den store sandkassen ber preg av å vera i flittig bruk!
Det er ein stor og flott samlingsplass Fatland Vel har laga til. Her kan ein både leika og ta seg ein pust i bakken på dei fine benkane.

Ballbinge og reiskapsbu

Hovudprosjekta til Fatland Vel akkurat no er å laga ein multiballbinge med tilhøyrande reiskapsbu. Her skal ein mellom anna kunna spela fotball, basketball, volleyball, handball og landhockey, i tillegg til noko som heiter speedminton, ein variant av badminton utan nett. I tillegg er det tatt høgde for at ein skal kunna laga skøytebane om vinteren.

– Per no er det ingen høvelege ballområde som ungdommane våre kan bruka, og det er mange som ventar på å endeleg få ein stad å spela fotball, seier Kjell Rune.

– Me har forflytta oss litt oppover frå samlingsplassen, til staden der ballbingen held på å byggjast. Han er nesten ferdig, men enno gjenstår litt "småputl" som til dømes å laga ferdig gjerdet av terrasseplank rundt anlegget. Håpet var å få ballbingen ferdig i løpet av året, men Fatland er ei lita bygd, med travle familiar, og når alt skal gjerast på dugnad, drøyer det gjerne litt av og til, fortel Kjell Rune.

Han legg til at arbeidsoppgåvene som gjenstår er lagt ut på den private Facebook-gruppa til Fatland Vel, slik at folk kan gå opp og gjera ein innsats når dei har tid, før det igjen vert kalla inn til felles dugnad.

Søknadar og pengestøtte

Forutan dugnadsinnsatsen frå dei fastbuande på Fatland, er dei vellukka prosjekta til Fatland Vel også avhengige av økonomiske midlar, noko som igjen avheng av å skriva og senda søknadar.

-- Det blir nokre timar i søknadsskriving, ja, vedgår Kjell Rune. Men timane brukt betyr mindre når eg ser kom mange som har glede av det me har fått til, konkluderer han.

Midlar har dei fått frå både Fjelberg Kraftlag Stiftinga og Fjelberg Kraftlag Midlar frå Haugaland Kraft, samt frå Sparebanken Vest sitt Eldsjelfond, og Frifond barn og unge, som er ei statleg støtteordning. I tillegg har Fatland Vel laga til både digital basar, loppemarknad og den digitale innsamlinga Spleis.

Artikkelen held fram under annonsen.

Loppemarknaden, som vart gjennomført sist vinter, var sjølvbetjent i eit telt på samlingsplassen. Her kunne folk komma og levera og handla lopper når dei ville. Teltet stod oppe i 4-6 veker og vart ein stor suksess.

– Ja, loppemarknaden var verkeleg kjekk, den skulle me gjerne gjentatt. Nokre av dei eldre innbyggjarane kom dagleg innom for å sjå! Dette kunne blitt ein tradisjon!

Det er kjekt å sjå kor mykje dei har fått til på Fatland gjennom den frivillige innsatsen sin. Og noko av det kjekkaste for oss som ikkje bur på Fatland, er at også me kan nytta oss av dei flotte fasilitetane om me vil.

– Sjølv om me primært har jobba for det vesle samfunnet vårt, er det ingen restriksjonar på kven som kan bruka det me har laga til her inne. Anlegga er for alle, og skal vera til allmenn glede, sluttar den driftige vel-formannen raust.

Minigolfkøller og flagg, samt fotballmål står klare til bruk for dei som måtte ønskja det, ved samlingsplassen til Fatland Vel.