75 år – med blikket framover

Gjennom trekvart hundreår har Grenda vore ein del av kvardagen til folk i Kvinnherad. Avisa har fortalt om det som har skjedd, løfta fram menneske og miljø, utfordra makta og gitt plass til dei mange stemmene som til saman utgjer eit lokalsamfunn. Slik har avisa også vore med på å dokumentere viktige hendingar i kommunen vår opp gjennom åra.

At Grenda framleis står sterkt etter 75 år, er noko vi har all grunn til å vera stolte av. Mens brorparten av norske aviser i dag er eigd av store mediekonsern, er Grenda ei frittståande avis med eit sterkt lokalt eigarskap. I likskap med mediebransjen elles har vi gjennom åra møtt på utfordringar, og spesielt har den digitale omstillinga dei siste åra har vore krevjande. Grenda har møtt denne utviklinga på ein god måte – med evne og vilje til å fornya seg, utan å mista det viktigaste av syne: oppdraget vårt som ei redaktørstyrt lokalavis.

Heldig

Det er også ganske spesielt at Grenda, i ei tid då opplaget for trykte aviser generelt går ned, har opplevd ein sterk vekst i opplaget dei siste åra. Det fortel oss at den gode, lokale journalistikken framleis betyr mykje. Det fortel også at det å setje seg ned med ei avis i hendene framleis har ein verdi.

Kvinnherad er heldig som har to lokalaviser. Konkurranse kan vera krevjande, men den skjerpar oss, gjer oss endå betre og bidreg til eit breiare og meir variert medietilbod. Når to konkurrerande lokalaviser følgjer med på det som skjer, stiller spørsmål og fortel ulike historier frå det som skjer rundt om i kommunen vår, er det til sjuande og sist innbyggjarane som vinn på det.

Bak dei gode resultata Grenda har oppnådd står dyktige og engasjerte medarbeidarar, aktive lokale eigarar, dyktige journalistar og eit lokalsamfunn som brukar, støttar og bryr seg om avisa. Som styreleiar vil eg rette ei stor takk til alle som gjennom 75 år har vore med på å byggja Grenda til det ho er i dag – og ikkje minst til alle medarbeidarar som kvar dag arbeidar for at avisa skal vera best mogleg.

Sjå framover

Eit jubileum som dette gir oss ein sjanse til å sjå tilbake på avisa med stoltheit, men det er likevel eit fint høve til å sjå framover med tru på det som kjem.

For ei frittståande lokalavis er oppdraget det same, sjølv om verktøya endrar seg: Å vera tett på menneska, stilla dei viktige spørsmåla, fortelja dei gode historiene og ikkje minst vera ei uavhengig og viktig vaktbikkje/stemme for lokalsamfunnet.

Gratulerer så mykje med 75-årsjubileet og lykke til med dei neste 75.

Knut Førland

Styreleiar