Stor kostnadssprekk – vil vurdera kjøp på nytt

Vedtok å leiga – vil no jobba for tannklinikken

I september i fjor vedtok Kommunestyret å leiga Fjordglytt-bygget (Skålagato 50) i Rosendal til ny helsestasjon, dette i samsvar med kommunedirektøren si innstilling. Leigesummen var avtalt til 312.000 kroner i året. Frp la i staden fram forslag om å kjøpa heile bygget for 8 millionar kroner, eit tilbod dei karakteriserte som veldig godt. Men partiet fekk berre støtte frå Synnøve Solbakken (Ap), og dermed vart leige bestemt.

Den gong vart det estimert at det ville kosta om lag 4,6 millionar kroner eks. moms å byggja om den øvste etasjen til helsestasjon, inkludert møblering. Helsestasjonen skal innehalda kontor for jordmor og helsesjukepleiar. 

I april i år etterlyste Knut Johannes Helvik (H) framdrift i ombygginga. Han fekk til svar at prosjektet skulle lysast ut før 17. mai, med oppstart rett etter sommaren. Men folk har sikkert sett at det ikkje har skjedd særleg mykje etter den tid. Forklaringa fekk vi i kommunestyremøtet førre veke. Då kom nemleg saka opp på nytt.

22 veker

Det viser seg nemleg at innkomne tilbod var ein del høgare enn dei avsette midlane.

«Entreprise er tildelt vinnar med atterhald om finansiering av prosjektet og politisk godkjenning i Kommunestyret. For at vi skal koma vidare i prosjektet må Kommunestyret ta stilling til om prosjektet skal realiserast, og i så tilfelle tildela nødvendige ekstra investeringsmidlar. Vedståingsfrist for tilbod er 10. november. Det er forventa ei total gjennomføringstid på prosjektet på 22 veker frå kontraktsignering», vart det opplyst i saksutgreiinga.

I budsjettet var det sett av 5,75 millionar kroner inkludert moms til prosjektet. Det er altfor lite.

Skal lysast ut før 17. mai

«Basert på innkomne tilbod vil totalkostnad på prosjektet koma på rundt 10,3 millionar inkludert mva. Sjølve entreprisekosten er rundt 7,5 mill. eks mva, men totalsummen inkluderer òg administrasjon, prosjektering, byggjeleiing og 4% uføresette kostnadar», vart det opplyst.

Kommunedirektøren innstilte på å gå vidare i prosessen, setja av nødvendige midlar og skriva kontrakt med entreprenør. Men politikarane var ikkje med på det.

Følelse av å ha blitt lurt

– Eg har nokre gonger tidlegare vore på talarstolen i samband med denne saka. Då har eg uttalt at dette har framstått som ein god prosess. Men når eg nok ein gong står her oppe for å uttala meg om ny helsestasjon i Rosendal, så veit eg ikkje heilt. Slik saka no framstår så tenkjer eg at heile Kommunestyret bør kjenna på ein følelse av å ha blitt lurt, kommenterte Ingve Hesjedal (Sp).

– Mest sannsynleg og forhåpentlegvis har ikkje dette vore ei bevisst handling av nokon av partane som har jobba med denne saka, men uansett så har ikkje kartet og terrenget stemt overeins, la han til.

Han fortalde at då saka kom opp fyrste gong, i april 2025, ville Sp kjøpa bygninga. Men på grunnlag av framlagte opplysningar så støtta dei kommunedirektøren si innstilling om leige då saka vart avgjort nokre månader seinare.

– Når saka blir lagt frampå nytt i dag kjem det fram at innkomne tilbod var ein del høgare enn avsette midlar i handlings- og økonomiplanen .Eg skal ikkje skryte på meg store matte-kunnskapar, men eg har rekna meg fram til at «ein del» altså er omlag 80%, funderte Hesjedal.

Ikkje tvil

Han utdjupa at kjensla av å ha blitt lurt førde til nokre spørsmål:

* Har Kommunestyret fatta rett vedtak når talgrunnlaget dei la til grunn var så feil?

* Korleis kan ein bomma så kraftig på kostnadane på investeringsbehovet?

* Kva er årsaka til dei auka kostnadane?

* Er det mogleg og fornuftig å terminera avtalen og starta prosessen på nytt, med rett talgrunnlag?

* Er det meir økonomisk berekraftig å kjøpa bygget i staden for å leiga?

Sp og SV la i fellesskap fram forslag om å senda saka tilbake til administrasjonen, der ein bed om at moglegheitene og konsekvensane av å terminera eller reforhandla avtalen vert utgreidd. Dei ynska også ei oppdatert vurdering av kjøp kontra leige.

– Nesten heile analysen til Ingve Hesjedal er korrekt. Det som ikkje er korrekt, er at det fanst folk i denne salen som ville kjøpa sist, men vi vart nedstemt, kommenterte Ove Lemicka (Frp).

– Når kostnaden på å bearbeida annan manns eigedom bortimot har dobla seg, er det endå ein god grunn til å sjå på om det gunstige tilbodet som vi hadde til å kjøpa ikkje er endå betre i dag. Det er ikkje tvil i mitt sinn – med dei prisane som låg i saka den gongen – at det ville vore rett å kjøpa. Det burde ikkje vera vanskeleg å løysa ut leigeavtalen og heller kjøpa eigedomen. Då investerer vi i eigen eigedom, analyserte han.

Løper litt løpsk

Høgre og Silvia Tofte hadde sitt eige forslag. Dei ville senda saka tilbake for ei utgreiing av kostnadsreduserande tiltak. «Om det er mogleg å forlenge vedståingsfristen skal ein forlenga denne fristen for å sikra gode vurderingar rundt kva som er det beste alternativet for vegen vidare», heitte det vidare.

Per Harald Havnen Löfgren Johansen (Ap) kom med ei presisering.

– Eg trur på ingen måte det er tilsette i kommunen som vil lura nokon, berre for å ha poengtert det. Men vi er sjølvsagt skuffa over å sjå at tala løper litt løpsk, sa han, og bad om tid til gruppemøte.  

Etter litt møteverksemd la Silvia Tofte fram eit nytt forslag på vegner av alle partia. Det vart naturleg nok samrøystes vedteke, og lyder slik: «Saka vert sendt tilbake der ein ber om utgreiing av kostnadsreduserande tiltak, samstundes skal det gjerast ei ny vurdering av totaløkonomien basert på leige eller eige som alternativ. Saka skal til behandling i kommunestyret 26. november 2026.»