Kommuneoverlege: Glenn André Opland melder om eit nytt smittetilfelle i Kvinnherad torsdag. Foto: Håvard Sætrevik

95 nærkontaktar i karantene og minst like mange i ventekarantene

Sjå kommuneoverlegen si oppmoding til kvinnheringane.

– Den siste veka har vi hatt ni nye smittetilfelle i Kvinnherad kommune. Vi har no 95 nærkontaktar i karantene, og minst like mange i ventekarantene. Tida framover blir avgjerande for kor vidt vi kan halda oss på det restriksjonsnivået vi har no, eller om vi må innføra strengar lokale tiltak, seier kommuneoverlege Glenn André Opland i videoen.

Fortløpande vurdering

Han påpeikar nok eingong kor viktig det er at kvinnheringane no tenkjer over kven dei gjer til sine nærkontaktar, og at vi har så få nærkontaktar som mogleg.

– Dette er ikkje tida for å samlast mange i festleg lag. Per no held vi oss til dei nasjonale retningslinjene, men vi ser an situasjonen fortløpande og set i verk lokale tiltak visst vi ser det naudsynt, seier Opland før han oppmodar om det heilt grunnleggjande:

– Hugs god smittehygiene, ver heime om du er sjuk, visst du har symptom, og test deg sjølv ved milde symptom. Det er veldig viktig at vi fangar opp smitte i samfunnet slik at vi ikkje har spreiing som vi ikkje veit om, sluttar han.