Blålys, smell og aktivitet på Husnes
Politi, brann og helse held denne veka på med omfattande øving på Husnes.
Politistasjonssjef Sigurd Børve fortel at dei ulike naudetatane er i gang med å gjennomføra den årlege PLIVO-øvinga si.
– I år er øvinga lokaliserert til rundt Kvinnherad vidaregåande skule. Det blir ein del aktivitet i området, og folk kan høyra smell og observera ein del blålys.
Annonse
Børve legg til at øvinga starta måndag kveld og skal halda fram tysdag kveld.
PLIVO er ei forkorting for pågåande livstrugande vald, og er ein prosedyre for samvirke mellom politi, brannvesen, redningstenesta og helsevesen ved hendingar der det blir utøvd livstrugande vald mot fleire personar.
Ifølgje Helsedirektoratet er prosedyren eitt av fleire oppfølgingstiltak etter hendinga 22. juli 2011.
