Gatebil: Brørne Ronny og Kjetil Teigen er blant kvinnheringane som skal delta i alle gatebil xtreme-løpa i år. Enkelte i Pit'n-teamet har bokstaveleg tala vore engasjert i sporten sidan fødselen. F.v. Vidar Røstbø, Rune Petterson, Ronny, Mathias og Kjetil Teigen. Foto: Jorun Larsen

– Det er mykje fart, leik og moro

Ronny og Kjetil Teigen skal delta på alle løpa i Gatebil xtreme-serien i år. Første sprett gjekk av stabelen i mai, kor dei henta heim fleire pokalar. Denne helga ventar neste løp i Mantorp i Sverige.

Brørne har køyrt og mekka på bil i ein god mannsalder til saman, og kjenner seg heime både på verkstaden og bak rattet. Grenda krasja ein av deira faste mekketysdagar på Pit’n bros Racing Team for å få eit innblikk i sporten og førebuingane.

– Køyringa er jo berre halvparten av opplegget, i tillegg kjem alt rundt og det er dessutan eit ekstremt godt miljø, forklarer Ronny.

Bilen han køyrte under det første xtreme-løpet i 2022 får ein naudsynt runde med overhaling, og er for høvet heist oppunder taket.

– Det er nokre deler som må bytast etter eit løp, samt reingjering og slikt. Bilane får ganske hard juling, legg han til.

Bladfyken blir tilbydt å skifte olje av Pit’n-Rune, men avstår høfleg frå oppgåva:

– Du vågar ikkje å gi ei slik oppgåve til meg.

Artikkelen held fram under annonsen.

– Å joda, det er ikkje min bil, ler han hjarteleg.

– Reine barnehagen

Rune Petterson er ein del av teamet som reiser rundt med Pit’n-lastebilen for å hjelpe til med navigering, reparering, skape stemning, samt å heie Teigen-brørne over målstreken.

I løpet av intervjuet viser det seg at han også er ein populær barnevakt for dei mange ungane som er med på lasset når det er gatebil-race på timeplanen, gjerne iført ei irrgrøn Aliens-drakt. Sist gatebilløp var det ni ungar med frå Kvinnherad.

– Reine barnehagen, kommenterer Petterson blidt.

Barnehageonkelen tek også på seg ansvaret som tolk når det gjeld å få den utsende frå Grenda til å forstå dei ulike formuleringane frå bilspråket, som til dømes at slicks er eit anna ord for mønsterlause dekk.

Det blir ein del svidd gummi etter eit gatebilløp. – Sist plukka me av gummi tilsvarande ei ti-literbøtte. Og den gummien kom frå dei andre bilane, forklarar Rune Petterson. Her står han ved eitt av slicksa, altså dei mønsterlause dekka, til Ronny sin Chevrolet Camaro. Foto: Jorun Larsen

Stor interesse lokalt

Teamet som er på plass denne mekke-tysdagen består av Teigen-brørne, Petterson, Vidar Røstbø og Mathias Teigen (13), son til Ronny. Sistnemnde var berre 6 veker gamal då han var med på sitt første gatebilløp, og han har ikkje sett seg attende sidan den gong.

Artikkelen held fram under annonsen.

Faktisk ser han helst framover, for han gler seg (som ein unge) til å bli gamal nok til å køyre større bilar og fleire løp.

Tidlegare i vår gjorde han det godt i Vestlandsmeisterskapen i gokart. Bana var tøff, noko den unge piloten fekk merka godt.

– Etterpå var eg gul og blå her, her, her, her og her, seier han, og peikar rundt på dei fleste kroppsdelene sine. Når han blir 14 kan han endeleg delta i Formel 1 basic, noko han knapt klarar å vente til.

Mathias Teigen har vore engasjert i sporten sidan fødselen. Når dei andre i teamet lurer på noko, er det Mathias dei spør. - Her går det i bil 24/7, understrekar faren. Foto: Jorun Larsen
Les også
Gode prestasjonar av unge gokart-talent frå Husnes

Engasjementet hans har truleg ein samanheng med at også motorsport-miljøet i Kvinnherad både er stort og godt.

– Det er tolv bilar frå Kvinnherad som køyrer i vår klasse. På startfeltet i eit løp er det mellom tolv og 50 bilar, så det er potensielt ein solid gjeng frå Kvinnherad som deltek. Me er fire berre frå Husnes, forklarar Ronny vidare.

Mykje show

Ronny og Kjetil køyrer i xtreme-klassa, der det handlar om å køyra fort. Den andre gatebil-klassa er drifting, som går ut på rask sidelengskøyring, sladding og mykje show. Men det er mykje show i xtreme òg, noko som mellom anna viser att i designet på bilane og i effektane dei investerer i.

Artikkelen held fram under annonsen.

– Ho må jo få prøvesitja bilen, føreslår ein av team-medlemmane frå Pit’n, svært generøst.

Dei senkar bilen, ein Porsche 996 Gt3, og flippar ut rattet på null sekund. Dernest ønskjer dei lukke til over gitteret som utgjer storparten av vekta i bilen, og som samstundes gjer føraren inni så trygg som mogleg. Bladfyken glir ned i det nær altomsluttande setet, før rattet kjem på plass att.

Ein nøkkelring dinglar frå tenninga. «Don’t die» lyder teksten frå det raude tøystykket.

Teamet forklarar kva dei ulike knappane og effektane er til for. Peikar på ventilasjonsanlegget som ikkje fungerer. Forklarer at delane i bilen er laga av dei lettaste materialane for at bilen skal gå fortast mogleg.

– Og dette er liksom heilt trygt?

– Ein er fullstendig sikra. Hjelm med nakkestøtte blir festa i beltet, og du sit som limt inni her. Det er svært sjeldan at folk som driv med racing blir skada under løp, bilane er laga for å kunna tola ein støyt. Sidan ein er festa i selen, går ikkje hovudet lenger fram enn dette om det smell, forklarar Ronny og viser med eit kort nikk.

– Ein tenkjer dessutan ikkje i slike banar når ein er fylt til randen av adrenalin. Faktisk er det farlegaste å køyre til og frå gatebilløpa, legg han til.

Ronny Teigen har laga seg ein gynge-bilstol. – Denne blir med til gamleheimen, smiler han, medan han vuggar lett fram og tilbake i Pit'n sin snasne lounge. I bakgrunnen kan ein sjå bilen som aldri blir ferdig, ein grom Chevrolet Camaro Z28R med 1060 hestekrefter. Foto: Jorun Larsen
Nøkkelringen frå Drivenbymio, også kjend som Broiler, eller om ein kallar han med namn; Mikkel Christiansen, er sikkert ein god påminnar når ein suser av gårde i langt over 200km/t. Foto: Jorun Larsen

Medievante Kjetil

Frå sist gatebil xtremeløp kara Ronny til seg to pokalar medan Kjetil sanka tre. I verkstaden figurerer sistnemnde tilsynelatande helst i bakgrunnen, noko dei andre i teamet sjølvsagt finn sitt snitt til å kommentera.

– Det er ein fin humor internt når vi er på racing. «Her kjem medievante Kjetil Teigen!», hermar Rune etter ein av speakarane frå sist gatebilløp.

Kjetil er kjent som medievant i gatebilmiljøet fordi han er ein av fem førarar som blir følgt i ein komande dokumentar om gatebil. Han er ein av to representantar frå xtreme, medan det er tre førarar frå drifting som blir følgt i den to timar lange dokumentaren.

– Dei filmar med drone og alt, det er skikkeleg kult, understrekar Rune.

Det er enno ikkje kjent kva tid dokumentaren med den medievante xtreme-føraren frå Kvinnherad blir å sjå.

Medievante Kjetil Teigen fann seg helst eit hjørne når Grenda sin utsende greip fatt i kamera. Foto: Jorun Larsen

Populær sport

Gatebilkonseptet byrja i 1994, og i Norge er det Rudskogen som har vore attraksjon nummer ein: på det meste har festivalen hatt opp til 40.000 publikummarar på ein dag. Når dei skal delta i nytt løp i helga er det på ein bane som liknar ei flystripe.

Les også
I dette beistet av ein bil skal Ronny kappkøyra mot eit fly

– I Mantorp køyrer me rundt 270 kilometer i timen. På Rudskogen ligg me rundt 240. Men då det var kappkøyring mot eit fly på Sørstokken var eg over 300, forklarar Ronny.

Det var ikkje hasardiøs køyring, understrekar han, før Vidar kjem med eit godt poeng.

– Alle køyrer jo same veg, så det er ikkje det same som på vanleg veg.

Sidan byrjinga i 2007 har Mantorp Gatebil Summer Festival blitt den største motorfestivalen i Sverige. Arrangøren lovar intensiv action i tre døgn til endes, noko Teigen-brørne og Pit’n Racing Team skal gjera sitt for å leva opp til i dagane som kjem.

Mathias Teigen er hekta på bil. Her har han fått autografen til Hunter Taylor, som er ein aktiv Gatebil-deltakar i drifting. Foto: Jorun Larsen
Pit'n Bros Racing Team køyrer ein gjennomført stil. Foto: Jorun Larsen
Kvar tysdag samlast Pit'n Racing Team i verkstaden på Reset for å mekka bil. Foto: Jorun Larsen
Ronny vil aldri bli ferdig å bygga på sin Chevrolet Camaro Z28R. Får ein rive augo vekk frå den skinande blå lakken, er det verd å merka seg hylla bak. Foto: Jorun Larsen