Grenda startar podkast
I ein lengre periode har Grenda jobba med å få på plass eit splitter nytt studio, og no lanserer vi Grendemellom - ein podkast om smått og stort i kommunen.
Podkast-ideen var ikkje heilt Grenda sitt eige initiativ, men likevel er redaksjonen veldig spente på det nye produktet som no skal lanserast.
– Vi fekk ein telefon frå LLA (Landslaget for lokalaviser) i haust, som lurte på om vi kunne tenkja oss å bli med i innovasjonsprosjektet "Morgendagens Lokalavis 2030", fortel redaktør Morten Nygård.
Annonse
Filma
Gjennom prosjektet skal seks aviser testa ut ulike innfallsvinklar for å nå unge lesarar, som per definisjon strekk seg frå tenåringar til 40-åringar.
– Vi var heldige og fekk podkast som vårt prosjekt, og vi var fleire i redaksjonen som tente på denne ideen. Vi har sett av mykje tid og ressursar til prosjektet, og håpar at dette blir bra, seier Nygård.
Episodane kjem også til å bli filma, så lyttarane kan velja sitt føretrekte format. I følgje redaktøren har Grenda i lengre tid hatt ambisjonar om å filma intervju og debattar, og gjennom prosjektet fekk avisa eit lite spark bak til å ta fatt på denne draumen.
Annonse
Sjølv om prosjektet i hovudsak går ut på å nå dei unge, vil podkasten, som for øvrig har fått namnet Grendemellom, også tilby episodar med tema som kjem til å engasjera også dei litt eldre.
– Her vil det nok vera nokon for ein kvar alder.
Første episode
Gjennom innovasjonsprosjektet har Grenda fått økonomisk støtte til å kjøpa inn utstyr, og dagleg leiar Jarle Håvik har tatt på seg ansvaret som teknikar og produsent.
Podkasten kjem til å koma med jamne mellomrom, og redaktøren kan røpa at det er mange spennande tema og namn på lista.
– Første episode kjem torsdag 26. februar og blir å finna både i nettavisa vår og på Spotify.
Annonse
I første episode har Grenda fått besøk av to representantar frå ungdomsbasen på Husnes, som snakkar om arbeidet dei gjer for og med ungdom i kommunen vår.
– Her skal det nemnast at vi har hatt sjølvaste Mauricio Weimar på besøk, så den blir nok vel verdt å høyra, lokkar redaktøren.
I første episode av Grenda sin nye podkast har journalist Anette Kathenes intervjua to tilsette ved ungdomsbasen på Husnes. Ei av dei intervjua er Marte Prestnes Ersland, som er syster til Kathnes. Redaksjonen er sjølvsagt merksam på relasjonen, og har gjort ei sjølvstendig vurdering av habilitet og rollefordeling i arbeidet med saka.
