«Lærdal»-trøbbel – igjen

Rute 2, som blir trafikkert av MF «Lærdal», er ute av drift inntil vidare.

Klokka 1015 fredag formiddag skulle MF «Lærdal» gått frå Årsnes, ein seglas som varte i om lag 40 meter før framdrifta svikta for ferja. Ferja blei liggjande i ro i nær 20 minutt før ho kom tilbake til kai, og bilane om bord måtte rygga av på Årsnes.

MF «Sildafjord», som skulle gått frå Årsnes kl. 1030, blei liggjande på vent utanfor Årsnes til dess «Lærdal» hadde fått lossa seg for bilar og kome seg frå kai.

– Bilane blir losa over i «Sildafjord» no, medan «Lærdal» ligg på fjorden, observerer Grenda-journalist Morten Nygård, som tilfeldigvis skulle med 1015-avgangen.

Her er folk som skulle i gravferd på Varaldsøy, til Haukeland på legebesøk og til Flesland for å fly til Roma.

– Ein ting er for oss som opplever dette ein gong i skotåret, men for dei som bur på Varaldsøy må dette vera veldig plagsamt, meiner Nygård.

Klokka 10.49 sendte Fjord1 eit sms-varsel om at Rute 2 er innstilt inntil vidare.