Opnar for drop-in for tredje vaksinedosen

I ei orientering tysdag ettermiddag opplyser kommuneleiinga at dei jobbar med å organisera dagar for drop-in-vaksinering.

– Me er i ferd med å få ganske mange dosar med covid-vaksine, fleire enn me eigentleg ville ha. Me jobbar difor med å få på plass nokre dagar til ekstra vaksinering både før jul og i romjula. Me kjem med ei oppdatering på heimesida vår når me har desse datoane endeleg settla, opplyste kvalitetssjef i Kvinnherad kommune Gunn Tove Petterteig under ein digital pressekonferanse på tysdag ettermiddag.

Tredje dose

– Alle over 45 år som har 4,5 månader eller meir sidan andre dose kan no bestilla sin tredje dose. For alle under 45 år er det seks månader som gjeld inn til vidare. Me oppmodar publikum om å gå inn på nettsidene våre eller timebestilling.remin.no og sjekka seg fram til raskaste datoen for deira tredje dose, sa Petterteig.

Ho forklarte at dei har prøvd å ringa til alle over 75 år om time for den tredje dosen.

– Dei me ikkje har fått tak i vil få brev av oss. Me merkar stor pågang på at folk ynskjer å vaksinera seg.

Vaksinetelefonen (90860166) eller e-post covid19@kvinnherad.kommune.no er kvikkaste måten å få kontakt om ein vil ha vaksinen, enten det er første, andre eller tredje dosen.

Nytt testregime

Kvinnherad kommune har vore rause med utdeling av hurtigtestar.

– Det har vore bra, og har truleg bidrege til å dempa smitteutbrota her lokalt. No er alle kommunar uroa for at dei har for lite hurtigtestar. Dei som no blir ståande ut, blir ståande ute i kortare tid, og det blir slutt på at alle som ynskjer det kan få testar, forklarte Petterteig.

No er det nærkontaktar til personar med kritiske samfunnsfunksjonar og dei med symptom for blir prioriterte, og barn og tilsette ved helsetenesta skal prioriterast med hurtigtestar.

– Elles er det om det er kjent smittesporing. Det blir ein plakat på desse boksane med testar som forklarer kven som kan ta, og me stoler på at folk følgjer desse reglane, slutta Petterteig.

Gult nivå

Skular og barnehagar er no på gult nivå.

– Det alle viktigaste bodskapen er at barna skal oppleva ein mest mogeleg normal kvardag. At dei har ein plass å gå til kvar dag, som skule eller barnehage, er viktig. Det er også viktig for at foreldra skal få gjort ein jobb for samfunnet. Det har vore mykje sjukdom blant barn og ungdom i haust, og det har vore krevjande for våre tilsette. Dei har stått på i desse tidene, og dei har gjort ein god jobb, men er nok slitne no, vurderte sektorleiar for oppvekst Anne Sofie Kjeka.

At ein er på gult nivå betyr at elevane blir igjen delt inn i kohortar.

– Det betyr ekstra reinhald, og det betyr at dei vaksne må vera på vakt på fellesareal. Kan ein avgrensa skuleskyss, så er det noko å tenka på. I det heile er det færre kontaktar og mindre kontakt på tvers. Vidaregåande er på raudt nivå, og dei førebur seg på heimeskule. Dei vaksne i skule og barnehage må nok bu seg på å halda avstand eller bruka munnbind når dei er saman, sa Kjeka.

Treng vikarar

Ho oppmodar pensjonistar og studentar til å søkja om vikarjobbar i skule og barnehagar no.

– Nye ordningar er no på plass, der løn frå slikt arbeid ikkje vil bety innkorting i stønader eller stipend om ein tar vikarjobb i oppvekstsektoren, la ho til.

Dei fleste arrangement er allereie avlyste, men kinoen er framleis open for maksimalt 50 i salen pr. framsyning. Både biblioteket og Bua held ope som vanleg.

Rådhuset er ikkje stengt, men mange blir pålagt heimekontor.

– Ta kontakt via telefon eller e-post om ein treng avtala eit fysisk møte, oppmodar kommunedirektør Ragnhild Bjerkvik.