Opplagsauke for Grenda: – Fantastiske tal

Landslaget for lokalaviser (LLA) og Mediebedriftenes Landsforening (MBL) la tysdag fram nye opplagstal, no for 1. halvår i år. 

Dei ferske tala viser at Grenda har eit opplag på 2833, noko som er ein auke på 111 samanlikna med same periode i fjor.

– Dette er fantastiske tal for Grenda. Det er nesten utruleg at vi held fram med å auka omtrent måling etter måling. Så veit vi at det kan gå opp og ned, men tendensen frå 2019 har vore veldig tydeleg med jamn vekst, seier redaktør Morten Nygård.

Største papiravisa

Framleis er det Grenda som er den største avisa i Kvinnherad når ein berre ser på papirabonnentar, no med 1911 i papiropplag, 7 opp frå same periode i 2024.

For Kvinnheringen gjekk papiravisopplaget frå 1876 i 2024 (1. halvår) til 1586 i år (-290). Avisa har også hatt ein nedgang i totalopplaget på -92.

– Det er interessant at avstanden til vår lokale konkurrent no er mindre enn den har vore på 45 år. Det er ikkje så lenge sidan dei hadde eit opplag på i overkant av 2000 meir enn oss, og no er avstanden under 1000. Vi må ha gjort noko som lesarane i Kvinnherad set pris på. Ambisjonen vår er å halda fram med å laga det vi synest er gode aviser, og så får vi sjå korleis utviklinga held fram, sluttar Nygård.