PTM med mange ynske kring byggjesaker

I oktobermøtet til Plan-, teknikk- og miljøutvalet (PTM) presenterte leiar Øyvind Hardeland (Ap) ei liste med forslag utvalet vil at skal innarbeidast i strategiplanen for byggjesaker og planar.

– Etter tre år i PTM-utvalet ynskjer vi at desse punkta skal nyttast for å få til ei god planlegging og byggjehandsaming med gode og effektive løysingar. Erfaringa vår er at vi for framtida lyt prioritera kva planar og kva prioriteringar vi må gjennomføra for å utvikla og drifta kommunen med mål om 15000 innbyggjarar, sa han, og understreka at kommunen ikkje har uavgrensa med ressursar, tid eller pengar.

Mellom annan ynskjer han god dialog frå fyrste dag, samt klare mål og bestillingar.

– Administrasjonen og politikarane får då ein felles eigarskap og forståing som gir gode løysingar for framtida, sa Hardeland.

Strandsona

– Mange gode punkt her, kommenterte Stein Olav Ølvestveit (Sp).

Men han stussa over punkta som gjeld bygging i strandsona.

– Då kjem ein inn på ting som vi i Kvinnherad ikkje bestemmer. Byggjegrensa er der enten vi likar det eller ikkje. Men tanken er veldig god, vurderte han.

Oddbjørn Kroka (H) meinte Kvinnherad kommune har høve til å endra sin eigen «blå strek».

Alle stemte for punkta som vart lagt fram, bortsett frå Jostein Saghaug (MDG).

– Det er ikkje PTM som bestemmer kva planarbeid som skal gjerast i administrasjonen. Det er det Kommunestyret som skal gjera, påpeika han.

– Dette er ikkje eit vedtak, det er eit forslag som blir sendt til dei som jobbar med strategiplanen for byggjesak og plan, presiserte Oddbjørn Kroka.

Færre reguleringsplanar

Lista ser slik ut:

• Følgja oppmodinga frå staten om å ikkje krevja fleire eller meir detaljerte planar enn nødvendig.

• Følgja oppmodinga frå staten om at planvasking ikkje skal enda i nye planar, men vera ei strategisk vurdering for å sjå kva nytte kommunen vil ha.

• Utnytta handlingsrommet i lover og reglar, og aldri krevja meir utgreiing enn strengt nødvendig

• Minst mogeleg idealplanlegging som kostar mykje, tek for lang tid og reduserer byggjeaktiviteten.

• Kun krevja reguleringsplan når det er tale om større utbyggingar.

• Dispensera frå godkjende planar når det er nødvendig for å få realisert viktige prosjekt.

• Nytta statlege regelverk for sone 3 i all forvaltning av strandsona. Også når det krev dispensasjon frå kommunale planar.

• Kun senda saker som har nasjonal interesse til Statsforvaltaren.

• Ha som mål «Rask og god handsaming av planar».

• Målet for alle planforslag er at dei blir enkle og forståelege og ikkje så omfattande at dei «aldri» blir realiserte.

• Prioritera planar for område som skal byggjast ut.

• Justera eldre planar som mindre vesentlege endringar.

• Folkevalde alltid deltek når plansaker skal drøftast med Statsforvaltaren og andre offentlege etatar.

• Når eit område er avsett til utbygging i godkjent kommuneplanen, skal formålet alltid vera viktigare enn byggegrensa mot sjø.

• Kunna nytta kunstig intelligens i planlegginga.

• Nytta eigen kompetanse på tvers av etatar i alle planar. Målet er minst mogeleg bruk av konsulentar og styrka eigen kompetanse.

• Målet med planar skal alltid vera å gi moglegheiter og utvikling . Ikkje avvikling.

• I oppstarten av planar inkludera politikarane. Einig om bestillinga med klare mål og leveranse.

• God dialog mellom innbyggjarar , administrasjon og politikarar, der ein prøver å finna gode, framtidsretta løysingar.