Haugaland Kraft Fiber om kjøpet av Kband:
– Skal byggja vidare på det som allereie er skapt
Torsdag vedtok Kommunestyret å selja Kvinnherad Breiband til Haugaland Kraft Fiber for 300 millionar kroner. No fortel kjøparen meir om planane sine.
«Med ny eigar får Kvinnherad Breiband tilgang til større fagmiljø og auka investeringskraft. Ambisjonen er samtidig å byggja vidare på den lokale infrastrukturen, kompetansen og nærleiken til kundane i Kvinnherad», skriv Haugaland Kraft Fiber i ei pressemelding dagen etter vedtaket i Kommunestyret.
Kvinnherad Breiband er i dag heileigd av Kvinnherad Energi, som igjen er eigd av Kvinnherad kommune. Haugaland Kraft Fiber betalar 300 millionar kroner for selskapet. Kvinnherad Breiband har 14 tilsette, over 5 700 kundar og ein høg utbyggingsgrad i Kvinnherad.
Annonse
– Kvinnherad Breiband har dyktige medarbeidarar, ein omfattande infrastruktur, gode kunderelasjonar og sterk lokalkunnskap. Dette er viktige verdiar som vi ynskjer å byggja vidare på. Saman kan vi skapa eit større og sterkare regionalt fagmiljø, samtidig som vi tar vare på nærleiken til kundane og det lokale nærværet i Kvinnherad, seier Mariann Salvesen, direktør i Haugaland Kraft Fiber.
Utvikla vidare
For Kvinnherad Energi har det vore viktig å finna ein eigar som kan byggja vidare på verksemda og møta behova Kvinnherad Breiband står overfor i årene som kjem.
– Kvinnherad Breiband har gjennom mange år bygd opp ei solid verksemd med ein omfattande infrastruktur, kompetente medarbeidarar og ei viktig rolle i lokalsamfunnet. I vurderinga av ny eigar har vi vore opptekne av både den vidare utviklinga av selskapet og omsynet til tilsette, kundar og Kvinnherad-samfunnet. Vi meiner Haugaland Kraft Fiber gir eit godt grunnlag for å utvikla verksemda vidare, opplyser Øyvind Lernes, dagleg leiar i Kvinnherad Energi.
Annonse
Gradvis integrasjon
Haugaland Kraft Fiber overtar Kvinnherad Breiband allereie 30. oktober, men eigarskiftet betyr ikkje at alt vert endra med ein gong. Kvinnherad Breiband fortsett i fyrste omgang som eige selskap med Haugaland Kraft Fiber som eigar. Fyrste fase vil i hovudsak handla om teknisk integrasjon.
Planen er at Kvinnherad Breiband på litt sikt vert fusjonert inn i Haugaland Kraft Fiber. Integrasjonen skal gjennomførast gradvis over ein periode på om lag 18–24 månadar.
– Vi skal bruka den tida som er nødvendig. Dei tilsette og kompetansen deira er ein viktig del av det vi får med oss, og det same gjeld kunnskapen om kundane og lokalsamfunnet. No skal vi bli betre kjent og leggja eit godt grunnlag for den vidare utviklinga saman, seier Salvesen.
Kundane skal forhalda seg til Kvinnherad Breiband som før, og vil få informasjon dersom det seinare kjem endringar som berører produkt, avtaler eller kundetilhøve.
– Vi kjenner betydninga av å ha kompetanse nær kundane og god forståing for lokale behov. Vi kjem til Kvinnherad for å byggja vidare på det som allereie er skapt. Målet er å kombinera dei lokale styrkane i Kvinnherad Breiband med ressursane og utviklingsmoglegheitene som følgjer med eit større regionalt miljø, avsluttar Mariann Salvesen.
