Uskedalen blir igjen røystestad

Kommunestyret fekk torsdag opp ei sak om søndagsopne vallokale under kommune- og fylkesvalet neste haust. Kommunedirektøren innstilte på at det ikkje vert søndagsope, slik det har vore vanleg i Rosendal og på Husnes tidlegare.

I sakspapira vart det opplyst om følgjande tal: På valdagane i 2025 var det totalt 1099 som røysta på Husnes, av desse 253 på søndagen og 846 på måndagen. I Rosendal var det totalt 695 som røysta, fordelt med 144 på søndagen og 551 måndagen. På måndagen var det elles 431 som røysta på Halsnøy og 228 på Hatlestrand.

«Dei 397 søndagsrøystene utgjorde 5 prosent av alle røystene. Ein oversikt frå Valdirektoratet syner at det i 2025 var høve til også å røysta på søndagen i 115 kommunar, altså i under ein tredjedel av landets kommunar. Kvinnherad var den einaste kommunen i Sunnhordland, og éin av fem kommunar i Vestland, med søndagsope i 2025», står det.

Trass dette var valdeltakinga høgare i alle dei andre sunnhordlandskommunane: Bømlo 83,3%, Stord 81,0%, Fitjar 85,6%, Etne 81%, Tysnes 84,5% og Sveio 83,2%, mot Kvinnherad 79,1.

I tillegg vart det påpeika at stadig fleire nyttar sjansen til å førehandsrøysta.

Småpengar

SV ville ha søndagsope på Husnes og i Rosendal.

– Å ha ope søndagen før valdagen er med på å gjera det meir tilgjengeleg, sa Wermund Vetrhus.

Ove Lemicka (Frp) var heilt samd, og meinte i tillegg at Uskedalen igjen skulle ha ope for røysting måndagen.

– Dette har vi kjempe for før, og det er småpengar i den store samanhengen. Vi hugsar at folket i Uskedalen var ganske indignerte den gongen vi tok frå dei valtinget. Det er ei av dei største bygdene i Kvinnherad, og det skulle berre mangla at vi ikkje har valting der, sa Lemicka.  

Fungerer veldig bra

Oddmund Skår opplyste at Høgre stilte seg bak kommunedirektøren si innstilling.

– Førehandsrøystinga fungerer veldig bra. Dette er pengar vi kan spara, vurderte han.

Alf Jarle Langeland (KrF) påpeika at i Rosendal og på Husnes har folk rikeleg anledning til å røysta før valet.

– Det er kanskje i utkantane vi burde ha søndagsope, kommenterte han.

Ved røystinga vart det 23-11 for kommunedirektøren si innstilling. Dermed blir det ikkje opne vallokale på søndagen. Men Ove Lemicka sitt forslag om val i Uskedalen på måndagen vart vedteke med 18 mot 17 røyster.