Øyvind til topps: – Blir jamt heilt til slutt

Han er bror til ordførar Vegard Bjørnevik. Men endå viktigare; han leiar Grendaligaen i Fantasy.

Etter å ha innkassert åtte poeng meir enn næraste utfordrar førre helg, har Øyvind Bjørnevik overteke leiinga i Grendaligaen. Han ligg no fire poeng føre Andreas Bjørsvik og 15 føre Håvard Sætrevik.

– Sjå der, ja! Er eg i teten? Det var bra det, smiler han når Grenda ringer.

Men Øyvind er slett ikkje ukjent med suksess i Grendaligaen. For i den andre utgåva, sesongen 2020/21, gjekk han heilt til topps. Grunna koronapandemi og elles travle dagar har han enno ikkje kome seg på fotballtur til England for å feira triumfen.

– Det blir nok ikkje denne sesongen heller, men kanskje i starten av neste, fortel han.

36-åringen er oppvaksen i Høylandsbygd, men bur no i Stavanger. Der jobbar han som konsernleiar for bygg og eigedomar i NorSea, eit selskap som eig og driv forsyningsbasar for offshoreindustrien.

Topp 10.000 i verda

Fantasy er ein viktig hobby.

– Eg har gjort det ganske bra dei siste fem åra. Tre gonger har eg vore på topp 10.000 i verda, og det er eg veldig nøgd med. Det er også ei målsetjing eg har. Men eg er litt overraska over at det har gått så bra, for det er jo litt tilfeldigheiter med i spelet, seier Øyvind.

Sjølv er han grundig i førebuingane føre kvar runde, og let ikkje magekjensla styre for mykje.

– Nei, det er ikkje mykje magekjensle. Eg høyrer på nokre podcastar, og så brukar eg ein del analyseverktøy. Og så investerer eg litt etter eigne preferansar, avslører han.

I førre runde var det mellom anna tre Arsenal-karar som sytte for poengfangsten. Sjølv om han er tilhengar av Manchester United, er han ikkje redd for å velja spelarar frå ein av erkefiendane.

– Eg legg vekk dei United-kjenslene når eg driv med Fantasy, humrar Øyvind Bjørnevik.

– Kva tenkjer du om resten av sesongen?

– Eg veit ikkje kva chips dei andre har igjen, sjølv har eg eit Wild Card til gode. Men eg trur det blir ganske jamt heilt til slutt. Mykje kjem an på kor risikoviljug ein er. Sjølv har eg valt ein ganske konservativ strategi, og det kjem eg nok til å fortsetja med. Det blir i alle fall spennande, for eg ser dei andre stort sett gjer kloke ting, analyserer han.

De Bruyne

I runde 32 var det ein annan fotballkjenning som gjorde det aller best. Anders Næs fleska til med heile 96 poeng, fyrst og fremst takka vera eit svært inspirert val av Kevin De Bruyne som kaptein. Pedro Porro i forsvar, Havertz på midten og Watkins i angrep betalte seg også svært godt.

Runde 33 vert spela laurdag til måndag.

Dei beste i runde 32:

Nr. totalt, Lag, Manager, Poeng runde 32

173. Odegardium Leviosa, Anders Næs, 96

171. AC Haugesund, Karsten Skåla, 93

109. To good to be true, Sondre Røssland, 88

41. Karlovako, Hilde Røyrvik, 87

71. Nautavatn FC, Bjørn Olav Tveit, 85

137. Taco, Tore Martin Grøneng, 85

164. EikelyFC, Mathias Ring, 85

272. Konrads Comrades, Ivar Konrad Lunde, 85

135. Amelia’s beste, Amelia Skåla, 84

146. Pollis, Anette Pollmann, 84

409. Lexus, Ove Olsen, 84

Topp 10 samanlagt

Nr., Lag, Manager, Poeng runde 32, Poeng totalt

1. Bamsebukt XI, Øyvind Bjørnevik, 69, 2047

2. +, Andreas Bjørsvik, 61, 2043

3. Mmmmålet, Håvard Sætrevik, 65, 2032

4. Digne-Loo Digne-Ley, Yngve Sundfjord, 67, 2011

5. Kenneth’s kickers, Kenneth Røssland, 75, 2007

6. Roger Hunt Hunters, Morten Fosse, 56, 1984

7. Birtes utvalgte, Birte Thoresen, 74, 1980

8. Lykke & Fromme, Bernt Bjørsvik, 64, 1979

9. No Clue, Susann Førre Knutsen, 66, 1973

10. Bowen Arrow, Sigval Myren, 66, 1968