Julehelsing til ungdommen:
– Vi får tid til å pusta

Kjære ungdommar.

No som jula nærmar seg vil vi i ungdomsrådet senda ei varm julehelsing til alle ungdommar i kommunen. Jula er ei tid der mykje stoppar opp. Vi får ein pause frå skule, prøvar og kvardagsstress, og vi får tid til å pusta. Jula er ei tid for glede og fellesskap. Samstundes veit vi at jula kan vera ei vanskeleg tid for nokon. Då er det viktig at vi tek vare på kvarandre.

I ungdomsrådet har vi brukt året på å synleggjere ungdom og trekkje fram saker vi trur er viktige for ungdom i kommunen. Vi har engasjert oss sterkt i saka om skuletilbod ved KVV, vore tydelege på at skulehelsetenesta må styrkjast, og løfta fram at ungdom skal bli tenkt på når kommunen planlegg nye område.

Ungdomsrådet jobbar for at ungdom skal bli tatt på alvor i politikken, gjennom meir reell medverknad og ei sterkare stemme i kommunen. I tillegg har vi vore opptatt av viktige saker som trygge vegar og fritidskort for dei som treng dette. Dette fordi kvardagen til ungdom ikkje berre handlar om skule, men om heile livet rundt.

No når vi går inn i eit nytt år håpar eg at endå fleire ungdommar ønsker å engasjera seg. Vi treng sterke stemmer frå ungdom, fordi dei betyr noko.

Har du saker du meiner kommunen bør bli betre på, eller noko du ønskjer at vi i ungdomsrådet skal ta vidare, håpar eg du tar kontakt med oss. Ungdomsrådet er til for ungdom, og vi vil løfta fram sakene som er viktige for deg.

Vi ønskjer med dette alle ungdommane i Kvinnherad ei god jul og eit godt nytt år.

Helsing

Frøya Sverresdotter Hatteberg

Leiar i Ungdomsrådet i Kvinnherad.