12 vegar kan bli private – PTM sendte saka i retur

Då PMT-utvalet hadde møte tysdag ettermiddag, fremja kommunedirektøren ei sak med forslag om at ein del kommunale vegstrekningar i Ølve, Hatlestrand og Varaldsøy skal omklassifiserast til private vegar.

«Der Kvinnherad kommune står som eigar av grunn vil dette fortsetja, men vedlikehald og drift blir overført til brukarane. Brukarane skal oppretta veglag som står for dette», stod det i innstillinga.

Konkret omfatta forslaget følgjande 12 strekningar: Hjortåsvegen (1020 meter), Bakken (175 m), ende Skarvatunsvegen (200 m), ende Netlandsvegen / Ask (900 m), Stussvik (277 m), Kirkhus (337 m), Åkre til naust (heile vegen er registrert som privat, men nokon meiner dei fyrste 180 metrane er kommunal), Øyerhamn X ved sjø til Mowi as (800 m), Øyerhamn heile til kryss fylkesveg (9000 m), til Kyrkjebygdvegen 82 (160 m), Havnerås (80 m) og Øvsthus (415).

Vanskeleg å talfesta

«I denne omgang er berre vegar i Ølve, Hatlestrand og Varaldsøy vurderte. Totalt har Kvinnherad cirka 190 kilometer kommunal veg. Det blir for omfattande å laga sak på alle aktuelle vegar for omklassing i ei sak. Vi er i gang med vurdering av vegar i andre deler av kommunen, og vil leggja fram sak om desse i løpet av vinter/vår», vart det opplyst i saksutgreiinga.

Ein bakgrunn for saka er at Kvinnherad kommune stadig tek over nye vegar, til kommunale formål eller i tråd med eldre reguleringsplanar.

«Med dette som bakteppe må vi ta ut vegar som ikkje lenger har allmenn bruk», vert det konkludert.

Administrasjonen la til at eksakt kor stor innsparing kommunen vil ha av slik omklassing, er vanskeleg å talfesta. Men det blir opplyst at drift og vedlikehald av kommunale vegar kostar i snitt 75 kroner per meter.

«Vi vil ikkje få full utteljing i tråd med dette, mellom anna fordi vi stadig sit med felleskostnader som blir fordelt på alle vegar. Ein reduksjon av det kommunale vegnettet vil gje ei innsparing eller ei omfordeling av ressursane til andre vegstrekningar. Vintervedlikehald vil reduserast umiddelbart som følgje av lågare timebruk», står det om dei økonomiske konsekvensane.

Går ut av bruk

«Alt avheng av kor stor innsats vi må gjera på den einskilde veg og på om det skjer hendingar som øydelegg vegane. Men arbeid som vintervedlikehald, kantrydding, grusing, asfaltering, grøftereinsk med meir vil ikkje lenger bli utført for kommunal rekning», vert det lagt til.  

Det vert elles vist til «Hovudplan for kommunale vegar i Kvinnherad» som vart vedteken i Kommunestyret 22. mai i fjor. Ein del av planen inneheldt retningsliner for omklassifisering av kommunale vegar til private.

Administrasjonen meiner det ikkje er eit krav om at kommunen må rusta opp vegen før den vert privat.

«Omklassifisering av veg er eit kontinuerleg arbeid. Vegar som ikkje er i bruk, som går ut av bruk, som får endra bruk eller som blir erstatta av ny veg, vil det vera naturleg å vurdera om kommunen framleis skal ha drift og vedlikehald av. I tillegg bør vi sjå om det er vegar som vi kan utelate vintervedlikehald av. I denne omgang legg vi fram eit forslag om nedklassing av vegar som ikkje er i bruk til heilårsbustad, vegar som er kortare tilkomst til bustadhus og der det er langt til neste kommunale veg. Vidare vegar som har tydeleg preg av fritidsbruk, tilkomst til naust, hytter, båthamn med meir», vart det utdjupa i sakspapira.

Råka veldig skeivt

Før sakshandsaminga fekk PTM-utvalet ein e-post frå Viljar Synnevåg. Han reagerte på at det i sakspapira står at Stussvikvegen berre blir brukt av fritidsbustader.

«Dette stemmer ikkje. Om slikt slett arbeid skal stå til grunn for politiske avgjerder i kommunen, står det dårleg til. Elles vil eg seia at eit slikt forslag kan råka veldig skeivt utover i kommunen og potensielt vanskeleggjera arbeidet til for eksempel heimetenesta. Forstår at dette kanskje kan sjå ut som nokre kroner spart, men det kan fort verta slik at dei forsvinn då frå andre plassar», skreiv han.

Synnevåg nemner også at Stussvikhovda er eit kjært turmål for mange i bygdene rundt, og tykkjer det ikkje vil vera i allmenta si interesse å endra på dette.

«Når dette er sagt, så er det ikkje utført nemneverdig vedlikehald på denne vegen i mi levetid», skriv han, og legg til at han ikkje trur det er store innsparinga om kommunen slepp å brøyta desse om lag 300 metrane.

Sendt tilbake

PTM-leiar Øyvind Hardeland (Ap) opplyser til Grenda etter møtet at saka vart sendt tilbake til administrasjonen. Den skal så koma attende til PTM, og då vil politikarane vedta å senda den ut på høyring.