Årets namn 2024: Sjå kven kandidatane er og stem!

Her er dei 12 kandidatane i utslagsrunden i kåringa av «Årets namn i Kvinnherad 2024».

Også i år vert det fyrst ein utslagsrunde i kåringa av «Årets namn i Kvinnherad». Du har 12 namn å velja blant, og dei tre med flest røyster går vidare til den store finalen.

No er det opp til folk der ute til å senda tre vidare til finalen. Røystinga kan mellom anna skje via skjemaet under. Men NB! Feltet med namnet til den som røystar må fyllast ut. Røystesetlar som manglar skikkeleg namn, vil ikkje bli godteke. Dette er for at Grenda skal kunne sjekka at folk ikkje har røysta fleire gonger, for hugs at du berre kan røysta éin gong.

Vi oppmodar som alltid om at ein røystar på den kandidaten ein tykkjer fortener heideren mest, uavhengig av geografi, kjennskap og andre moment.

Fristen for å røysta i utslagsrunden er tysdag 3. desember klokka 09.00. Dei tre finalekandidatane vert presenterte i avisa torsdag 5. desember.

Kandidatane

Her er litt informasjon om kandidatane (i tilfeldig rekkefølge):

Tina Abdulla

Handballspelaren frå Husnes gjer det svært godt, og er klar for å spela NM-finale med Storhamar i desember. I mai vann dei European League, som det fyrste norske laget. Sjølv om Tina ikkje skal spela EM med landslaget dei komande vekene, var ho med i den såkalla bruttotroppen.

Anika Madsen

Sjefskokken på Iris, restauranten på Salmon Eye, vart kåra til årets unge kokk av Michelin. Restauranten hennar, som tiltrekkjer seg gjester frå heile verda, fekk også ei Michelin-stjerne.

Anders Kjærevik

I juli vann løparen frå Varaldsøy gull i NM i skogsløp, med eit sterkt felt bak seg. Han gjorde det også sterkt i VM i fjelløp i juni, og vann løpet LPA Trail i Las Palmas de Gran Canaria i mars.

Mauricio Weimar

Ikkje berre kom Mauricio til finalen i Norske Talenter, med fabelaktig trommespel og underhaldning, han tok også med seg ni andre flotte representantar for Kvinnherad på finalenummeret.

Rita Martens Meyer

Leiaren i Pensjonistforbundet HVØ gjer ein kjempejobb for pensjonistane i området. Ho arrangerer turar og mange andre aktivitetar for eldre, og tilbyr skyss til dei som treng det. Rita har også sytt for rydding av seks toppløyper.

Øystein Skaala

Øystein Skaala fekk saman med Rosendalstiftinga laga sin tredje film i år, «Vi lyttar til havet». Dei opna også tretopphytta «Lerkereiret» i Steinparken i haust. Det var Skaala som var initiativtakar til Steinparken.

Per Korsvold

Etter å ha tapt veddemål med dottera, sykla Per Korsvold heilt til Lyon medan han samla inn pengar til Kreftforeninga. Han fekk seg også jobb som sjøfly-pilot i den storslåtte teaterproduksjonen av «Peer Gynt» i Gålå.

Bjørn Heimvik

Heimvik har gjennom ei årrekke gjort ein stor innsats med Turstiar Sunde. I juli vart eit nytt utsiktspunkt opna på Gråhammar, og i august vart Heimvik og Turstiar Sunde tildelt Folkehelseprisen i Hordaland.

Guro Femsteinevik

Skiskyttaren frå Hatlestrand imponerte i Junior-VM, der ho mellom anna tok stafett-sølv saman med dei andre norske jentene. Ho tok også sitt første NM-gull i seniorsamanheng i år.

Valedamene

I fleire år har Valedamene jobba for bygda si, og etablert både bygdehus og trimrom. I april i år kunne badstova på Valen opnast, til glede for alle.

Arne og Anna Gjerde

Grunneigarane av Fatlandsskogen har utarbeidd turløyper, formidla naturkunnskap og kultur, og utforma svært fine turmål for barnefamiliar, løparar og turgåarar. Dei har saman med Fatland Vel stått for mange kjekke og samlande arrangement i området.

Jørn Øyrehagen Sunde

Uskedelingen er ein av landets fremste ekspertar på Kristenretten og Magnus Lagabøte si landslov, som begge hadde jubileum i år. Sunde heldt flotte føredrag her lokalt, på Moster, og då han bidrog live i NRK si maratonsending om landslova.