Etterlyste gang- og sykkelveg:
– Eit kritisk trafikksikringstiltak
I kommunestyremøtet 29. oktober spurde Stein Olav Ølvestveit (Sp) om framdrifta for Lundsbakkane gang- og sykkelveg i Dimmelsvik.
Ølvestveit hadde merka seg kommunen sin rapport for 2. kvartal, der det står følgjande om prosjektet Lundsbakkane gang- og sykkelveg:
«Vidare framdrift i planarbeidet er noko avhengig av budsjettsituasjonen. Arbeidet står i ro til budsjettavklaringar er gjort».
Annonse
– Dette er eit kritisk trafikksikringstiltak langs fylkesveg 500, ikkje minst for skuleborn og mjuke trafikantar i området. Prosjektet inkluderer også viktige utbetringar som ny bru og flaumsikring. Det er uheldig om eit så viktig planarbeid blir ståande fast i uvisse i påvente av budsjettavklaringar, sa Stein Ølvestveit.
På denne bakgrunn stilte han to spørsmål.
1. Vil ordføraren ta politisk initiativ til å sikra dei nødvendige avklaringane, slik at administrasjonen kan ferdigstilla dette viktige planarbeidet utan ytterlegare opphald?
2. Sidan dette gjeld ein fylkesveg; har dette spesifikke prosjektet vore på dagsorden eller vorte løfta fram av kommunen i møte og dialog med Vestland fylkeskommune?
Annonse
Avgrensa med midlar
Svara til kommunedirektør Leif Ove Mikkelsen bar ikkje bod om at noko vil skje snarleg.
– I vegprosjekt som dette er det ynskeleg at konkret prosjektering og formelt planarbeid skjer parallelt, for å sikra at den planlagde utbygginga blir gjennomførbar. Viss byggjeprosjektet ikkje har finansiering, så vil det også påverka prioriteringa av planarbeidet, sa Mikkelsen.
Han opplyste vidare at prosjektering og planlegging så langt i hovudsak har blitt kosta over den generelle posten for trafikksikring, og der er det avgrensa med midlar.
– Så kommunen vil leggja til rette for politisk behandling rundt dette med finansiering med formål om at planlegginga kan gå vidare, la han til.
Kommunedirektøren fortalde at saka har blitt teke opp med Vestland fylkeskommune fleire gonger.
Annonse
– Fylkeskommunen har så langt meldt at dei ikkje har midlar til utbygging. Trafikksikring langs fylkesvegane er veldig viktig for oss i Kvinnherad. Ordføraren og administrasjonen vil derfor ta dette opp igjen vidare i sin kontakt med fylkeskommunen, lova Mikkelsen.
