Fekk svar om sjøleidning til Skarvo:
– Kabelen må leggjast i den djupaste delen av fjorden
I førre kommunestyremøte ynska Knut Johannes Helvik (H) at eventuell sjøkabel forbi Rosendal vert lagt lenger inne fjorden, ved Skarvo. Statnett svarar at dei utelukkar denne løysinga.
Frå talarstolen sa Helvik at han er gjort kjent med synfaringar om mogleg 420 kV-anlegg og manglande informasjon til oppsitjarane på Nes i Rosendal. Han meinte det framstår lite gjennomtenkt at Statnett vurderer Nes, som ligg innafor KULA-området.
– Eg opplever dette som eit forsøk på å provosera fram at det ikkje blir sjøkabel, vurderte han.
Han ynska at ordføraren skulle be Statnett om å utgreia eit alternativ lenger inn i fjorden, til Skarvo med sjøkabelen.
– Botnforholda i fjorden er ikkje nemneverdig annleis og skal vera teknisk OK. Som alternativ til plassering nede ved fjorden, er det i lia over god tilkomst via skogsbilveg, sa Helvik, og tilrådde boreholsteknologi frå fjorden og opp.
– Ved å nytta dette alternativet slepp ein å kryssa Skålafjedl, og kan då gå direkte opp lia til eksisterande trasé. Ein må forventa at Statnett er sitt samfunnsansvar bevisst og tek på seg oppdraget, la han til.
Tydeleg kommunisert
Ordførar Vegard Bjørnevik (H) las opp svaret, som også er referert i protokollen. Der blir det slege fast at det er forståeleg at synfaringane skapar uro hos grunneigarar, oppsitjarar og andre som kan verta råka.
«Statnett må difor sikra god og tidleg informasjon, og dialog med dei som vert direkte berørte på Nes og andre stader. Dette har kommunen tydeleg kommunisert overfor Statnett. Etter at kommunen fekk meldingar om uro og bekymringar, vart det halde møte med Statnett. Kommunen har òg motteke eit skriftleg svar frå Statnett på interpellasjonen og deira vurderingar i saka», står det.
Statnett skriv i brevet at dei er kjend med at Nes ligg i eit KULA-område.
«Alternativa må vurderast heilskapleg ut frå omsynet til landskap, kulturmiljø, naturverdiar, landbruk og lokalsamfunn, saman med forhold som sjøbotn, havdjupne, terreng, arealbehov, naturfare og tekniske og systemmessige krav. Statnett har opplyst at dei har gått bort frå alternativet med sjøkabel 2–3 kilometer lengre inn i fjorden mot Skarvo på grunn av bratt terreng og store havdjupner», heiter det i protokollen.
Klargjera nærare
Ifølgje Statnett er sjøområda nord for Naustvika og vidare utover Hardangerfjorden så djupe at dagens teknologi for 420 kV vekselstraumskablar ikkje kan nyttast.
«Dei bratte skråningane fører òg til at kabelen må leggjast i den djupaste delen av fjorden. Dette er bakgrunnen for at Statnett så langt har gått bort frå ei sjøkabelløysing forbi Naustvika. Anlegget vil krevja tre kabelsett med til saman ni kablar. Avgrensa plass, nærleik til busetnad, utfordringar knytte til trafikkavvikling og framtidig vedlikehald og reparasjonar gjer, etter Statnett si vurdering, ei løysing i eller langs fylkesvegen særs krevjande», vert det opplyst.
Men det blir likevel poengtert at desse tekniske vurderingane ikkje nødvendigvis betyr at ei løysing ved Skarvo er endeleg vurdert eller forkasta.
– Ordføraren meiner difor at kommunen bør be Statnett klargjera nærare kva alternativ som er vurderte, kva avgrensingar vurderingane byggjer på, og kva som ligg til grunn for at sjøkabelen ikkje er ført 2–3 kilometer lengre inn i fjorden mot Skarvo. Kommunen bør følgja Statnett sine utgreiingar tett og vurdera om nye eller endra alternativ gir grunnlag for arealavsetjingar i kommuneplanen», sa Bjørnevik.
Veldig pussig
– Vi får nok ein gong dokumentasjon på at Statnett problematiserer sjøkabel. Det er det økonomiske grunnar til, tekniske grunnar er det ikkje, responderte Knut Johannes Helvik, og oppmoda kommunen om å stå på vidare.
Per Harald Havnen Löfgren Johansen (Ap) tykte svaret frå Statnett var rart.
– Det er veldig pussig at dei kan leggja kabel ned på 530 meters djupne i Fensfjorden, men ikkje her. Det er vikarierande argumentasjon, kommenterte han.