Ber om differensiert buplikt i Kvinnherad
– På høg tid
Per Harald Havnen Löfgren Johansen (Ap) meiner det er på høg tid at det vert innført differensiert buplikt i Kvinnherad. På torsdag vil han ta saka opp i Kommunestyret.
Johansen har sendt inn ein interpellasjon til torsdagens møte i kommunestyret. Den handlar om å innføra differensiert buplikt her i kommunen. Han viser til at det er vakkert i Kvinnherad, med vill natur, elvar som slingrar seg nedover fjellsidene, og vakre kulturlandskap, med velpleidde, grøne enger, i tillegg til lune, varme bygder fylde av ro og harmoni.
Stort press
«Dette er blant Kvinnherads sterkaste sider for å behalde og rekruttera nye innbyggjarar til kommunen. Samstundes gjer det òg at Kvinnherad er ein attraktiv ferieplass, der mange bustadar blir kjøpt opp og nytta som feriehus», skriv Per Harald Havnen Löfgren Johansen i interpellasjonen.
Han påpeikar at når ein stor andel av heilårsbustadane i eit område eller ei bygd vert nytta som feriehus, har det ei rekke negative konsekvensar.
«Det skapar eit stort press på bustadmarknaden, som igjen resulterer i redusert tilgang til bustadar for fastbuande. Dette gir i neste omgang eit svekka grunnlag for barnehagar, skular, butikkar, frivilligheita og det kommunale tenestetilbodet i bygdene og lokalsamfunna våre. Om ein skal bøta på denne utfordringa må ein sikra at trenden snur, og at heilårsbustadar vert nytta som heilårsbustadar. Vi må starta arbeidet med differensiert buplikt», skriv han.
Ikkje tilbakeverkande
Johansen opplyser at grunnlaget for buplikt finn ein i Konsesjonslova. Der vert det opna for at kommunane kan be om forskrift om nedsett konsesjonsgrense, også omtala som nullgrenseforskrift. Lova opnar for at forskrifta kan avgrensa buplikt til bestemte område og/eller eigedomstypar (differensiert buplikt), med den hensikt å sikra at heilårsbustadar ikkje blir kjøpt og brukt som feriehus.
«Innføring av buplikt vil i hovudsak ikkje ha tilbakeverkande kraft, men vil gjelde for framtidige bustadtransaksjonar. Kva som er riktig modell for Kvinnherad må utgreiast nærare. Vi må få på plass eit godt kunnskapsgrunnlag før kommunestyret tek endeleg stilling i saka, og det må vurderast både administrative konsekvensar knytt til sakshandsaming og oppfølging av ei ordning», skriv Johansen.
Sekundærbustader
«Det er på høg tid at vi tek opp arbeidet med differensiert buplikt i Kvinnherad, og sikrar levande bygder med lys og varme hus», legg han til, før han stiller tre konkrete spørsmål:
1. Kor mange heilårsbustadar (einebustadar/våningshus) er det registrert i dei ulike bygdene i Kvinnherad? Og kor mange av desse har ikkje folkeregistrerte bebuarar?
2. Har kommunen oversikt over kor mange heilårsbustader som vert nytta som fritids- eller sekundærbustader i Kvinnherad? Korleis fordeler dette seg mellom dei ulike bygdene.
3. Kan ordførar ta initiativ til ei sak der Kommunestyret får vurdert differensiert buplikt i Kvinnherad kommune og konsekvensane av dette?