Leiaren i Stord Frp ynskjer å sjå på samanslåing av Stord, Bømlo og Kvinnherad:
– Spørsmålet er kva summen blir
Leiaren i Frp på Stord vil be ordføraren og kommunedirektøren ta kontakt med kollegaene i Bømlo og Kvinnherad med sikte på å starta ein prosess for å vurdera å slå saman dei tre kommunane.
Det var i eit lesarinnlegg publisert på nett hjå Sunnhordland og Grenda måndag at Reinert Svanberg tok opp spørsmålet om kommunesamanslåing i Sunnhordland. Konkret nemner han at Stord, Bømlo og Kvinnherad bør vera aktuelle for samanslåing. Svanberg er leiar i Framstegspartiet på Stord, i tillegg til at han er leiar i kommunen sitt utval for byutvikling.
Grenda ringer Svanberg for å høyra kva som er bakgrunnen for utspelet.
– Det eg ser er at Stord som regionsenter i Sunnhordland er for smått, og ein slit med å nå igjennom hjå Vestland fylke. Dette går utover alle i Sunnhordland, for skal ein oppretthalda gode tenester for innbyggjarane, så må ein få gjennomslag både hjå fylke og stat, seier han.
Gulrota
No vil han fremja ein interpellasjon i Kommunestyret på Stord. Viss den får fleirtal, vert ordføraren og kommunedirektøren bedne om å ta kontakt med Bømlo og Kvinnherad med sikte på å starta ein prosess, der ein greier ut ei mogleg samanslåing av dei tre kommunane.
– Eg ynskjer å få fram kva ein kan oppnå ved å slå seg saman. No vil ikkje nødvendigvis alle effektane vera positive, men spørsmålet er kva summen blir. Regjeringa har sett av midlar til slike utgreiingar, og det bør vi søkja om, opplyser Reinert Svanberg.
Han trur det er meir som samlar enn som skil desse kommunane. Ikkje minst påpeikar han at ein ny «Sunnhordland kommune» vil verta den nest største i fylket målt i innbyggjartal.
– Den økonomiske gulrota/belønninga regjeringa har lagt opp til for kommunar som slår seg saman er nok for liten. Men dei økonomiske innsparingane med kommunesamanslåing kan vera betydelege, spesielt over tid. Det vil også vera spennande å sjå kva effektar det har på andre område. Til dømes har vi ferjekaisaka som har pågått i 25 år, noko som ikkje hadde skjedd om vi hadde vore éi kommune, analyserer han.
Neppe realistisk
Svanberg har ikkje teke med kommunane Fitjar, Sveio og Tysnes i ideen om samanslåing. Det har sine årsaker.
– Eg trur vi må byggja frå den andre enden. Dei mindre kommunane har småskalafordeler, og får mellom anna ta del i stordriftsfordelane til dei andre. Dermed får dei ein gevinst av å vera små, og er har forståing for at dei difor ynskjer å stå utanfor, seier Reinert Svanberg, som har forankra utspelet sitt med Frp-laget på Stord.
Grenda har sendt førespurnad til Kvinnherad-ordførar Vegard Bjørnevik (H) om ein kommentar, men har førebels ikkje fått svar. Men til Sunnhordland seier han at forslaget til Svanberg neppe er særleg realistisk.
– Umiddelbart tenkjer eg at samarbeid er positivt. Men når det gjeld kommunesamanslåing, står Kvinnherad veldig tydeleg åleine, seier han.