Rykte ut til hærverk på Undarheim skule
Politiet fekk tysdag ettermiddag melding om at nokon hadde teke seg inn i den no nedlagte Undarheim skule, og det er langt i frå fyrste gong.
Ein patrulje rykte tysdag ut etter melding om uvedkomande inne på den nedlagte Undarheim skule. Ifylgje politistasjonssjef Sigurd Børve har dette vore eit problem over lengre tid.
– Det var nokre ungar som hadde teke seg inn på skulen, der dei hadde utført omfattande hærverk. Dette har skjedd ved fleire høve, så kven som har gjort kva er det ikkje mogeleg å seia noko om på noverande tidspunkt, uttalar Børve til Grenda.
– Det var også sett på vatn, som hadde forårsaka store vasskadar. Brannvesenet vart tilkalle for å ta hand om den biten, legg han til.
Samarbeid
Politiet tok hand om nokre av ungane på staden, men om det er desse som står bak vasskadane er uvisst.
– Me har eit samarbeid med kommunen om problemet, og jobbar for finne gode løysingar, avslutta politistasjonsjefen.