Barnehagen på Halsnøy er ein av dei private i Kvinnherad.

Støtta lokal forskrift om private barnehagar

Formannskapet sa seg samd i at barnehagane i Åkra og på Varaldsøy blir haldne utanfor utrekningsgrunnlaget for grunntilskot til private barnehagar i Kvinnherad.

Publisert

Formannskapet gjorde som Levekårsutvalet før dei og røysta samrøystes for å godkjenna den lokale forskrifta om grunntilskot til private barnehagar i Kvinnherad for tilskotsåret 2027.

«Høyringsinnspela er vurderte og innarbeidde slik det går fram av saksutgreiinga», vart det opplyst i kommunedirektøren si innstilling.

Framlegget til forskrift har vore på høyring. Det kom inn høyringssvar frå PBL, NHO Geneo, Espira og Læringsverkstedet.

«Høyringsinstansane er i hovudsak positive til at kommunen tek i bruk lokal forskrift, men har merknader til berekningsgrunnlaget og enkelte delar av forskrifta», vart det opplyst i saksutgreiinga.

Åkra og Varaldsøy

Spesielt uttrekket av kostnader knytt til barnehagane i Åkra og på Varaldsøy var kommentert i høyringsuttalane, og det vart etterlyst nærare dokumentasjon av dei særlege driftsføresetnadene.

«Åkra og Varaldsøy barnehage har særlege driftsføresetnader som medfører kostnader som ikkje er representative for ordinær kommunal barnehagedrift. Dette gjeld særleg: Vedvarande lågt barnetal, avgrensa moglegheiter for å tilpassa bemanning, manglande stordriftsfordelar, geografiske forhold, og behov for å oppretthalda eit lokalt barnehagetilbod. Kommunedirektøren vurderer derfor at kostnadene ved desse barnehagane kan haldast utanfor berekningsgrunnlaget», vert det argumentert.

Drifta av desse barnehagane medfører vesentlege meirkostnader samanlikna med ordinær kommunal barnehagedrift, og kostnadene blir derfor vurderte som ikkje representative. Kostnaden per heiltidsplass desse to stadene er utrekna til 334.000 kroner i året, noko som er 112.000 meir enn snittet hjå dei andre kommunale barnehagane.

Behandlast likt

– Veldig bra at det er gjort vurderingar kring Åkra og Varaldsøy barnehagar, kommenterte Per Harald Havnen Löfgren Johansen (Ap).

– Dei private skal behandlast likt, slik at ein ikkje styrer midlane vekk frå dei private barnehagane. Det må i alle fall ikkje føra til at rammene blir for små, oppmoda Ove Lemicka (Frp).

Saka skal vidare til Kommunestyret.

 

Powered by Labrador CMS