Intensjonsavtale med Fonna næringshage:
– Dette kan bli bra
Formannskapet gav kommunedirektøren fullmakt til å utarbeida intensjonsavtale med Fonna Næringshage AS.
I formannskapsmøtet 15. oktober var det lagt fram sluttrapport frå Fonna Næringshage om felles næringshage mellom Kvinnherad og Ullensvang. Både Kvinnherad og Ullensvang kommune får tilbod om å verte eigar i selskapet. Tanken er at kommunane skal eiga like mykje.
«Det er tenkt at Kvinnherad kommune skal stilla med ein aksjekapital på kr 100.000. Næringshagen er eit viktig verktøy for lokal og regional næringsutvikling. Kvinnherad som kommune ligg midt i mellom to industriregionar, Sunnhordland og Hardanger, og ynskjer å vera ein aktiv partnar i dette fellesskapet. Ved å gå inn som medeigar og partnar i ein næringshage, vil kommunen kunne utløysa statlege og regionale driftsmidlar», vart det opplyst i sakspapira.
Synergiar
– Dette er jo spennande, og det gir moglegheiter. Dette kan bli bra, vurderte Ove Lemicka (Frp).
– Eg synest det er veldig bra at vi jobbar aktivt for å auka samarbeidet med Ullensvang, følgde Alf Jarle Langeland (KrF) opp.
– Vi har mykje felles med Ullensvang, både turisme, kraft og industri, analyserte Per Harald Havnen Löfgren Johansen (Ap), og ser for seg gode synergiar.
Formannskapet gjekk samrøystes inn for at det vert utarbeidd intensjonsavtale. Eit eventuelt aksjekjøp vil koma opp som eiga sak.