Sju personar sit bak eit langbord med mikrofonar og datamaskiner i eit møterom
Ove Lemicka (t.h.) meinte det var feil å erklæra Siliva Tofte (t.v.) inhabil i saka om klagen frå Øybygg AS. Det enda med at saka vart utsett.

Utsette klagesak – skal vurdera inhabilitet

Klagen frå Øybygg AS vart ikkje handsama i Formannskapet likevel. I staden skal kommunedirektøren laga ei utgreiing kring inhabilitet.

Publisert

I september fordelte Formannskapet pengane i den søknadsbaserte ordninga om stimuleringsmidlar til private bustadfelt. Firmaet Øybygg AS på Halsnøy hadde inne fleire søknader, men desse vart samla til éi tildeling på 1 million kroner. Dette tykkjer Øybygg var feil, og sendte inn klage.

«Selskapet meiner vedtaket byggjer på ei misforståing knytt til innsendinga av søknadene, der ein søknad om einebustadtomter vart delt opp i to innsendingar på grunn av tekniske problem ved innsending. Øybygg AS peikar på at det, sjølv om desse innsendingane vert rekna som éin søknad, framleis ligg føre to separate bustadprosjekt: Ferdigstilling av 17 einebustadtomter i Landamarka og prosjektet Landamarka Klyngetun med ni bueiningar i form av tre tremannsbustader», står det i saksutgreiinga.

Øybygg viser vidare til at prosjekta har ulike prosjektrekneskapar, ulik finansiering, ulik framdrift og ulike målgrupper. Dei peikar også på at gjeldande retningsliner ikkje stiller krav om at separate prosjekt må liggja i ulike geografiske område.

«Øybygg AS meiner difor at Formannskapet feilaktig har handsama prosjekta som eitt tiltak, og at dette reduserer moglegheita for gjennomføring av Klyngetun-prosjektet. Øybygg AS ber om at klagen vert teken til følgje og at dei to prosjekta vert tildelt stimuleringsmidlar kvar for seg, i tråd med administrasjonen si tilråding i saka», står det.

Byggja ut i Uskedalen

Men då Formannskapet skulle handsama klagen på torsdag, vart det fyrst ein diskusjon om kor vidt Silvia Tofte (H) var inhabil. Ho er nemleg styreleiar i Halsnøy trelast AS, som driv i same bransje. Kommunedirektør Leif Ove Mikkelsen vurderte at ho var inhabil. Han viste til lovteksten om kva som «kan vera eigna til å svekka tillita».

Ove Lemicka (Frp) var heilt usamd. Han minna om at også han sjølv og Knut Johannes Helvik driv med bustadutvikling.  

– Eg er litt overraska over den vurderinga og konklusjonen, då dette har blitt vurdert annleis tidlegare. Eg har vore med og behandla desse sakene, det same har Knut Johannes Helvik, bortsett frå at han var inhabil då ein søknad gjaldt han direkte. Eg har dessutan blitt dagleg leiar i Uskedal eigedom AS, eit selskap vi har kjøpt som skal byggja ut i Uskedalen. Viss Silvia Tofte er inhabil, så er kanskje eg òg inhabil i desse sakene, kommenterte han.

Leif Ove Mikkelsen svarte at stimuleringsmidlane er ei ny ordning, og ein såleis ikkje har hausta mange erfaringar enno.

– Vi kan kanskje gjera ei meir generell vurdering av habilitetsreglane etter kvart, sa han.

Flinke juristar

Silje Nordtveit Olsen (SV) ynska å støtta kommunedirektøren no, men såg positivt på ei utgreiing.

– Eg synest dette er vanskeleg, vedgjekk ho.

Men Ove Lemicka var ikkje nøgd.

– Eg meiner det vil vera feil å erklæra Silvia Tofte inhabil, berre for å vera på den sikre sida. Vi kan eventuelt utsetja saka til nærare vurdering er gjort, føreslo han

– Vi har flinke forvaltningsjuristar i rådhuset som kan fordjupa seg i dette, responderte kommunedirektøren.

Formannskapet valde å oppfylla ynsket til Lemicka, og utsette dermed saka i påvente av ei juridisk utgreiing.

Powered by Labrador CMS