Sa nei til ynske frå Sunnhordland museum
– Ganske heisen auke
Eit samrøystes formannskap sa nei til førespurnaden frå Sunnhordland museum om auke i driftstilskotet.
Som Grenda har omtalt, har leiinga i Sunnhordland museum sendt førespurnad til eigarkommunane om å få ein monaleg auke i driftstilskotet. Konkret ynska dei at summen vert heva frå 12 kroner per innbyggjar til 50 kroner. For Kvinnherad sin del ville det betydd å gå frå om lag 160.000 kroner i året til cirka 660.000, altså eit tillegg på ein halv million.
Kommunedirektøren innstilte på å vidareføra samarbeidsavtalen med museet, men å seia nei til å auka støtta, det same gjorde Levekårsutvalet.
Annonse
– Eg har undersøkt korleis andre kommunar, mellom anna Stord, har forheldt seg til søknaden. Dei har kome til same konklusjon som oss, sa Silje Nordtveit Olsen (SV).
– Men det er absolutt viktig å ha ein god dialog med Sunnhordland museum. Det er rett at avtalen blir vidareført, men i vår situasjon er det òg rett at tilskotet ikkje aukar, analyserte ho.
Olsen rådde til at Kvinnherad høyrer med dei andre kommunane om dei kan bli samde om å auka tilskotet på sikt.
Alf Jarle Langeland (KrF) tenkte det same.
Annonse
– Det var ein ganske heisen auke, vurderte han.
Kommunedirektøren si innstilling vart samrøystes vedteke.
