– Viktig for oss å ha ein god tone med Kvinnherad

Adm. direktør John Martin Mjånes og myndigheitskontakt Magne Andresen var invitert til torsdagens formannskapsmøte i Halsnøy kulturhus. Der fekk dei forklara kvifor dei ikkje ville gje Kvinnherad kommune betre vilkår i samarbeidsavtalen som er oppretta i samband med bygginga av Blåfalli Fjellhaugen kraftverk. Som Grenda har skrive tidlegare var Formannskapet svært misnøgd med avtalen då den var oppe til handsaming i førre møte.

– Eg oppfattar at vi har hatt god dialog og gode samtalar, innleia Mjånes.

– Eg er veldig gald for å at får koma hit og forklara korleis vi tenkjer. Kvinnherad er ein utruleg viktig kommune for SKL, fortsette han, før Magne Andresen overtok ordet.

– Eg skal seia litt om korleis vi ser verda, og så er det ikkje sikkert vi ser verda likt, sa han.

Tre epokar

Andresen delte prosjekta i Blåfalli inn i tre epokar. Frå 1950 til 1990 handla det om utbygging av vasskraft. Det var ein prosess som hadde dei største konsekvensane, men òg genererte dei største inntektene. Frå 2000 til 2015 dreia det seg om å få til betre ressursutnytting. Inngrepa var då mindre, og det vart ikkje bygd nye demningar. Og så frå 2025 til 2029 føregår bygginga av Blåfalli Fjellhaugen kraftverk.

– Vi sendte den fyrste søknaden i 2014. Grunnen til at det har teke lang tid, er at prosjektet er krevjande økonomisk og det er vanskeleg å rekna heim, forklarte Andresen.

Han la til at ikkje skal skje store inngrep, og påpeika at staten meiner dei negative konsekvensane er så små at utbygginga er verdt å gjennomføra likevel.

Dei fyrste

Sa ja til SKL-avtalen likevel

– Ikkje mykje vi spør etter

Magne Andresen la elles fram tal som viste kor SKL si verdiskaping hamnar. Staten sikrar seg mesteparten av pengane, nærare bestemt 600 millionar kroner berre i 2025. Kvinnherad kommune kjem på 2. plass med 115 millionar i fjor. Deretter kjem dei ulike eigarane, med Stord kommune, der SKL har hovudkontoret, på sisteplass med 8,5 mill. kroner. Pengane som Kvinnherad får, kjem frå konsesjonskraft, konsesjonsavgift, eigedomsskatt og naturressursskatt.

– Og så kjem samarbeidsavtalen oppå der igjen, opplyste Andresen, og understreka at avtalen handlar om kompenserande tiltak og eventuelle synergiar i anleggsfasen, til dømes bruk av steinmassar. I denne fasen er det elles rekna ut at SKL må betala om lag 30 millionar kroner i ekstra eigedomsskatt til Kvinnherad.

– Kvinnherad kommune er dei fyrste som tener på prosjektet, i tillegg til leverandørane, sa Andresen.

Lova synfaring

Han avslutta med å fortelja at SKL bidreg i andre samanhengar også, utan at dette er skrive ned i nokon avtale. Han trekte fyrst og fremst fram ting som kjem grunneigarar og beitelag til gode, og nemnde konkret bygging av ny hengebru ved Svelgen i år.

– Vi håpar at dåke tek den avtalen som ligg i bordet, og det er viktig for oss å ha ein god tone med Kvinnherad kommune. Presentasjonen viste at dette er marginalt prosjekt, der dette (avtalen) kjem i tillegg til alt det andre. Vi meiner dette er ein fair avtale, følgde John Martin Mjånes opp.

Per Harald Havnen Löfgren Johansen (Ap) undra kor stor del av SKL si totale verdiskaping som skjer i Kvinnherad.

– Meir enn 50% av resultatet vårt blir skapt her inne, svarte Mjånes, og opplyste at det blir produsert 1,6 TWh kraft i Kvinnherad årleg.

Ordførar Vegard Bjørnevik (H) sa det hadde vore kjekt med ei synfaring i fjellet, og håpar det blir mogeleg å få til over nyttår. Mjånes ynska hjarteleg velkomen til ein slik tur.