– Ikkje mykje vi spør etter

Slakta SKL-avtalen – må i nye forhandlingar

I samband med bygginga av Blåfalli Fjellhaugen kraftverk har Kvinnherad kommune og utbyggjaren SKL utarbeidd ein samarbeidsavtale. Den inneheld kompenserande tiltak for ulempene kommunen har ved å vera vertskap for prosjektet, og omfattar mellom anna brøyting, vegutbetringar, gratis steinmassar og økonomisk støtte til aktivitetar for barn og unge.

Men då Formannskapet fekk avtalen opp til godkjenning på førre møte, vart det sagt eit svært tydeleg nei. I staden vart det bestemt at kommunen skulle gå i nye forhandlingar for om mogleg forbetra avtalen. Desse reforhandlingane førde ikkje fram, og torsdag kom same avtalen opp til ny handsaming.

Ikkje handlingsrom

SKL-sjefen: – Ein fair og god avtale

– Det eg tenkjer no, slik dei (SKL) ser verda, er at det ikkje er handlingsrom for å forbetra avtalen. Eg hadde håpa å fått til litt meir, men det er likevel positive ting i avtalen, innleia ordførar Vegard Bjørnevik (H).

Han er no mest fokusert på å kunna nytta steinmassane.

– Tippen skal lukkast i 2027, så om vi skal få utnytta desse massane må vi koma i gang snart. Men vi kan ta opp med NVE om å få utvida «opningstida» til tippen. Eg ynskjer at vi går inn for avtalen slik den ligg føre, men respekterer at det kan vera ulike syn. Vi kjem ikkje lenger, og då er det betre å ha ein avtale enn ingen, analyserte Bjørnevik.  

Dei fleste rundt bordet var samde i dette, unnataket var Per Harald Havnen Löfgren Johansen (Ap).

– Eg synest det er synd, og meiner vi ikkje burde akseptera dette her. Men eg skal ikkje krangla, og det er kome fram gode argument. Eg vil difor ikkje setja fram noko eige forslag, men vil røysta imot, opplyste han.

– Eg er ikkje skuffa over ordføraren eller kommunedirektøren, det er SKL eg er skuffa over, presiserte Johansen.

Ikkje har den viljen

Veronica Thorkildsen Thorsen (Sp) var på linje med ordføraren.

– Eg tek heller i mot avtalen enn å ikkje ha nokon avtale. Men forhåpentleg kan vi læra av dette til neste gong, sa ho.

Silje Nordtveit Olsen (SV) var litt skuffa, men ville seia ja, ho også.

– I dag har vi høyrt at SKL er opptekne av god dialog og relasjon til oss, og då er ikkje dette det resultatet vi skulle forventa. Det er ikkje mykje vi spør etter, og det skulle ikkje mykje til før vi hadde blitt nøgde. Men eg registrerer at dei ikkje har den viljen. Det tek vi med oss til neste gong, vurderte ho.

– Mykje av det som står i avtalen skulle dei gjort uansett, sa Thea Vaage (Ap).

Ho føreslo veglys i Åkra som eit prosjekt SKL kunne ha bidrege til.

– Det er litt trist at ein ikkje ser sitt snitt til å gjera slike utbetringar i Kvinnherad, meinte ho.

Avtalen vart godkjent med åtte mot éi røyst.